मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८१ बैशाख १ शनिबार
  • Saturday, 13 April, 2024
फाइल तस्बिर
प्रेम गौतम काठमाडाैं
२०७९ चैत १७ शुक्रबार ०६:४०:००
Read Time : > 2 मिनेट
मुख्य समाचार प्रिन्ट संस्करण

आज मन्त्रिपरिषद् विस्तार र शपथको तयारी, कुन नेतालाई कुन मन्त्रालयको जिम्मेवारी ?

Read Time : > 2 मिनेट
प्रेम गौतम, काठमाडाैं
२०७९ चैत १७ शुक्रबार ०६:४०:००

शुक्रबार दिउँसोसम्म मन्त्रिपरिषद् विस्तार भई अपराह्न मन्त्रीहरूको शपथ हुने प्रधानमन्त्रीका राजनीतिक सल्लाहकार हरिबोल गजुरेलले बताए । उनका अनुसार शुक्रबार दिउँसोसम्म मिलाउन बाँकी विषय मिलाउने र अपराह्न शपथ गर्ने तयारी छ । 

केही मन्त्रालयमा रहेको दोहोरो–तेहेरो दाबी टुंग्याएर शुक्रबार मन्त्रिपरिषद् विस्तार हुने भएको छ । गठबन्धनका केही दलले केही मन्त्रालयमा आफ्नो दाबी नछाडेपछि बिहीबार रोकिएको मन्त्रिपरिषद् विस्तार शुक्रबार गर्न लागिएको हो । यसका लागि प्रधानमन्त्री पुष्पकमल दाहाल प्रचण्डले दाबी दोहोर्‍याएका मन्त्रालयको विवाद टुंग्याउन सरोकारवाला दलहरूसँग संवाद गरिरहेका छन् । 

शुक्रबार दिउँसोसम्म मन्त्रिपरिषद् विस्तार भई अपराह्न मन्त्रीहरूको शपथ हुने प्रधानमन्त्रीका राजनीतिक सल्लाहकार हरिबोल गजुरेलले बताए । उनका अनुसार शुक्रबार दिउँसोसम्म मिलाउन बाँकी विषय मिलाउने र अपराह्न शपथ गर्ने तयारी छ । बिहीबार प्रधानमन्त्री प्रचण्डले गठबन्धन दलका शीर्ष नेताहरूसँग छुट्टाछुट्टै छलफल गरेका थिए ।

कांग्रेसमा उपसभापति पूर्णबहादुर खड्का उपप्रधानसहित रक्षा या परराष्ट्र मन्त्रालय भन्ने टुंगो लाग्न बाँकी छ । तर, रक्षामा उनी सन्तुष्ट नहुने देखिएका कारण परराष्ट्रको सम्भावना बलियो छ । यही आधारमा खड्काको टुंगो लागेपछि रमेश रिजाललाई कुन मन्त्रालय भन्ने तय हुनेछ ।

अर्थ मन्त्रालयमा डा. प्रकाशशरण महत, संघीय मामिला तथा सामान्य प्रशासन मन्त्रालयमा धनराज गुरुङ, कानुन मन्त्रालयमा डिगबहादुर लिम्बू र भूमि व्यवस्था तथा गरिबी निवारण मन्त्रालयमा सीता गुरुङको नाम तय भएको कांग्रेस नेताहरू बताउँछन् । 

स्वास्थ्य मन्त्रालयमा मोहनबहादुर बस्नेत या प्रदीप पौडेल भन्ने टुंगो लाग्न बाँकी छ । सहरी विकास मन्त्रालयमा एनपी साउद या बद्री पाण्डे भन्ने टुंगो लाग्न बाँकी छ । एक पदाधिकारीका अनुसार टुंगो लाग्न बाँकी रहेकाले अन्य केही नाममा समेत छलफल भइरहेको नेताहरूको भनाइ छ । 

मन्त्रीको अन्तिम टुंगो लगाउने जिम्मा सभापति देउवालाई छ । ‘सभापतिज्यूले छलफल गरिरहनुभएको छ । केही नाममा टुंगो लाग्न बाँकी छ । कसलाई जिम्मेवारी दिने सभापतिज्यूले अन्तिम टुंगो लगाउनुहुनेछ,’ ती पदाधिकारीले भने । ती पदाधिकारीका अनुसार स्वास्थ्य मन्त्रालयमा सभापति देउवाले बस्नेतलाई ल्याउन चाहेका छन् भने महामन्त्रीद्वयको जोडबल प्रदीप पौडेल रहेकाले टुंगो लाग्न बाँकी छ । त्यस्तै, सहरी विकास मन्त्रालयमा सभापतिले एनपी साउदलाई ल्याउने चाह राखेका छन् भने इतर समूहले तीन मन्त्रालय आफूले पाउनुपर्ने भन्दै बद्री पाण्डेको नाम अघि सारेको छ । 

मन्त्रीको नामबारे कांग्रेसमा दिनभरजसो छलफल चलेको थियो । सानेपामा कार्यसम्पादन समिति बैठकमा पनि नेताहरूबीच यसबारे छलफल भएको थियो । बैठकपछि पनि पदाधिकारीसँग सभापति शेरबहादुर देउवाले धुम्बाराहीस्थित निवासमा छलफल गरेका थिए ।

माओवादी मन्त्रीको जिम्मेवारी हेरफेर हुने भएको छ । भौतिक पूर्वाधार तथा यातायातमन्त्री नारायणकाजी श्रेष्ठले गृह मन्त्रालय र सामान्य प्रशासनमन्त्री अमनलाल मोदीले महिला एवं बालबालिका मन्त्रालय पाउने भएका छन् । ऊर्जा मन्त्रालयको जिम्मा शक्ति बस्नेतले पाउन सक्ने एक नेताले बताए । सञ्चारमन्त्री रेखा शर्मा र पर्यटनमन्त्री सुदन किराँतीले निरन्तरता पाउने भएका छन् । 

जसपाले शिक्षा मन्त्रालय पाउने मोटामोटी सहमति भएको छ । जसपालाई वन मन्त्रालय दिने तयारी रहेको स्रोतको भनाइ छ । जसपाले भने कृषि मन्त्रालय पनि दाबी गरेको एक नेताले बताए । अध्यक्ष उपेन्द्र यादवले शुक्रबार बिहानसम्ममा टुंगो लाग्ने दाबी गरे । मन्त्रीको नामबारे टुंगो नलागेको यादवले बताए ।

एकीकृत समाजवादीले भौतिक पूर्वाधार तथा यातायात मन्त्रालय पाउने भएको छ । यो मन्त्रालय उपमहासचिव प्रकाश ज्वालाले सम्हाल्नेछन् । उपाध्यक्ष बेदुराम भुसालले कृषि मन्त्रालय सम्हाल्ने भएका छन् । 

जनमतले उद्योग मन्त्रालय पाउने भएको छ । खानेपानीमन्त्री अब्दुल खान उद्योग मन्त्रालयमा सरुवा हुने भएका छन् । नेसपाका अध्यक्ष महिन्द्र राय यादवले खानेपानी मन्त्रालय सम्हाल्ने भएका छन् । 

लोसपाका शरत्सिंह भण्डारीले श्रम मन्त्रालय सम्हाले भएका छन् । नागरिक उन्मुक्ति पार्टीकी अध्यक्ष रञ्जिता श्रेष्ठलाई युवा तथा खेलकुद मन्त्रालय दिने तयारी छ । उनले सहरी विकास मन्त्रालय दाबी गरेकी थिइन् । 

कांग्रेसले आठ, माओवादीले पाँच, एकीकृत समाजवादी र जसपाले दुई–दुई, जनमत, लोसपा, नागरिक उन्मुक्ति, नेसपा र आम जनता पार्टीले एक–एक मन्त्रालय पाउने गरी सहमति भइसकेको छ ।