विराट गोल्डकप : भारतको केरला लुका सकर सेमिफाइनलमा 

विराटनगरमा जारी सातौँ संस्करणको विराट गोल्डकप अन्तिम क्वार्टरफाइनल खेलमा प्रतिस्पर्धा गर्दै पाहुना टोली भारत केरलाको लुका सकर क्लब सेमिफाइनलमा पुगेको छ ।

आइतबार साँझ विराटनगरस्थित सहिद मैदानमा भएको अन्तिम क्वार्टरफाइनलमा ‘ए’ डिभिजन क्लब संकटालाई सडनडेथमा ८–७ गोलले निराश बनाउँदै लुका सकर  सेमिफाइनल पुग्न सफल भएको हो ।

निर्धारित ९० मिनेट र थप गरिएको ३० मिनेटको अतिरिक्त समयमा पनि गोलरहित बराबरी भएपछि जितको छिनोफानो सडनडेथबाट भएको हो । रोमाञ्चक तथा प्रतिस्पर्धात्मक टाइब्रेकरमा दुवै टोलीले ५–५ गोल गरेका थिए । त्यसपछि खेल सडनडेथमा पुग्यो ।

टाइब्रेकरमा भारतको तर्फबाट चाल्स, रफी, कप्तान अर्सद र क्यामदिनले गोल गरेका थिए । संकटाका अनिष महर्जनको प्रहार भारतका गोलकिपर शानफिरले उत्कृष्ट बचाउँदै खेल जिताए । संकटाको तर्फबाट जुनियर कुलदीप कार्की, सुरजजंग ठकुरी, चन्दन दास र दीपक घिसिङले गोल गरेका थिए ।

भारतको जितसँगै विराट गोल्डकपको सेमिफाइनलको समीकरण पूरा भएको छ । भारतले अब फाइनल प्रवेशका लागि चैत १४ गते साविक विजेता एपिएफसँग खेल्नेछ भने घरेलु टिम विराटनगर सिटीले सोमबार जावलाखेल युथ क्लबको सामना गर्नेछ ।