- वि.सं २o७९ चैत ८ बुधबार
युनाइटेड अरब इमिरेट्स (युएई)ले राष्ट्रिय क्रिकेट टोलीका मुख्य प्रशिक्षक रोबिन सिंहलाई पदबाट हटाएको छ । आइसिसी विश्वकप क्रिकेट लिग–२ मा युएईलाई उत्कृष्ट नतिजा दिलाउन नसक्दा प्रशिक्षक सिंह बर्खास्तीमा परेका हुन् । आइसिसी विश्वकप लिग–२ मा लगातार खराब प्रदर्शन भएपछि अहिले युएईको एकदिवसीय मान्यतासमेत जोखिममा छ ।
लिग–२ को तालिकामा युएई छैटौँ स्थानमा छ । युएईले यसै सातादेखि नामिबियामा एकदिवसीय विश्वकप ग्लोबल छनोटमा स्थान बनाउन प्लेअफ छनोट खेल खेल्दै छ । प्लेअफ छनोटमा शीर्ष दुई स्थान रक्षा गर्न नसक्दा युएईको एकदिवसीय मान्यता पूर्ण रूपले खोसिनेछ । युएईले शीर्ष तीनमा रहँदै जुन–जुलाईमा जिम्बावेमा हुने एकदिवसीय विश्वकप छनोट खेल्ने अवसर चुकाएको थियो ।
विश्वकप लिग–२ मा युएईले घरेलु तथा नेपालमा भएको सिरिज गुमाएको थियो । तालिकाकै सबैभन्दा कमजोर पपुवा न्युगिनीसँग लगातार खेलमा पराजित हुँदा युएईको विश्वकप लिग–२ को शीर्ष तीनमा पुग्ने सम्भावना समाप्त भएको थियो ।
पछिल्ला १५ मध्ये तीन खेलमा जित निकाल्दा युएई छैटौँ स्थानमा सीमित भयो ।
रोबिन सिंहको प्रशिक्षक युएईले कुनै पनि पक्षमा उत्कृष्ट प्रदर्शन गर्न सकेन । युएईको बलियो मानिएको ब्याटिङ निकै कमजोर देखियो । उनले खेलाडीलाई बारम्बार प्रयोग गरिरहँदा पनि युएईले विश्वकप लिग–२ को निर्णायक खेलहरू गुमायो । कुनै समय रोबिन सिंह भारतीय राष्ट्रिय क्रिकेट टोलीका अलराउन्ड खेलाडी थिए । मध्यक्रममा उनी विस्फोटक ब्याटिङ गर्न रुचाउँथे ।
सिंहले भारतका लागि १३६ एकदिवसीय खेलमा दुई हजार तीन सय ३६ रन बनाएका थिए । उनले आफ्नो एकदिवसीय खेलमा एक शतक र नौ अर्धशतक बनाएका छन् । एकपटक मात्र टेस्ट खेलमा मौका पाएका सिंहले २७ रन जोडेका थिए । यसैगरी, १३६ एकदिवसीय खेलमा उनले ६९ विकेट हात पारे । उनले पहिलो श्रेणीमा १७३ तथा लिस्ट एमा १५० विकेट लिएका छन् । पहिलो श्रेणी क्रिकेटमा सिंहले २२ शतक र ३३ अर्धशतकको सहयोगमा ६ हजार नौ सय ९७ रन जोडेका थिए । लिस्ट एमा २२८ खेलबाट उनले चार हजार ५७ रन जोड्दा एक शतक र २० अर्धशतक लगाए ।
