समाचार डिजिटल संस्करण

गाउँ नै उठीबास लगाउने भूमाफियाको प्रपञ्च, स्रेस्तामै नभएको कागजात भेटियो

भूमाफियाले गाउँ नै खाली गराउन धम्क्याएपछि सर्लाहीको ईश्वरपुर नगरपालिका– १२ कालिन्जोरका स्थानीय त्रसित बनेका छन् । कालिन्जोरमा आइतबारदेखि भूमाफियाको समूहले गाउँ रहेको जग्गा नापजाँच गर्न थालेपछि स्थानीय सशंकित बनेका हुन् ।

स्कारपियो चढेर आएका आठ–नौजनाको समूहले गाउँको एक कुनाबाट जग्गा नापजाँच सुरु गरेका स्थानीय बुद्धसिंह बाइवाले बताए । सदियौँदेखि आफूले भोगचलन गर्दै आएको जग्गा यसअघि दाबी गर्न कोही नआएको उनको भनाइ छ । कहिल्यै नदेखेका समूहले आफूले जोतभोग गरिरहेको जग्गा नापजाँच गर्न थालेपछि आक्रोशित स्थानीयले उनीहरूलाई नियन्त्रणमा लिएर प्रहरीको जिम्मा लगाएका छन् ।

उनीहरूमध्ये सातजना पक्राउ परेका इलाका प्रहरी कार्यालय केश्वरगञ्जले जनाएको छ । पक्राउ पर्नेहरूमा बाराको जितपुर–सिमरा– ११ का उमाशंकर साह, विनयकुमार चौधरी, वडा नम्बर १ का ज्ञानबहादुर लामिछाने, सिराहाको कर्जन्हा– १ का राहुलकुमार साह, धनुषाको मिथिला– ९ का जयकुमार ठाकुर, क्षीरेश्वरनाथ– ५ का विजयकुमार साह र महोत्तरीको मनरासिस्वा– ४ का धीरेन्द्र झा रहेका छन् । उक्त समूह सवार प्रदेश ३–०१–०२२ च १८४१ नम्बरको स्कारपियो र उनीहरूको साथबाट पाँच लाख रुपैयाँ नगदसमेत प्रहरीले बरामद गरेको थियो ।

स्थानीय दयासागर गौतमका अनुसार पछिल्लो केही समययता गाउँमा नयाँ–नयाँ मानिसको समूह आउने गरेका थिए । उनीहरूले गाउँको जग्गाको विषयमा समेत कुरा गरेको उनको भनाइ छ । ‘गाउँमा कतिजनाको लालपुर्जा छ ? कि छैन ? जस्ता प्रश्न गर्थे,’ उनले भने । उक्त समूहको गतिविधिसँगै चहलपहलसमेत बढ्दै गएको गौतमले सुनाए ।

त्यसवेलासम्म आफूहरूलाई उनीहरूको गतिविधिको विषयमा कुनै जानकारी नभएको स्थानीय सन्तोषी अस्थानीले बताइन् । ‘यसरी समूहमा आउने केहीले जग्गा हाम्रो हो, अब गाउँ खाली गराउनुपर्छ । नमाने जे पनि हुन सक्छ भन्थे,’ उनले भनिन् । आइतबारको घटनापछि गाउँका मानिस त्रसित भएका उनले सुनाइन् । ‘उनीहरूले मार्छन् भनेर रातभर निद्रा लाग्दैन,’ उनले भनिन्, ‘माफियाले पहिला पनि धम्क्याउने गरेका थिए ।’ आइतबारको घटनापछि गाउँमा नयाँ मान्छे देख्नेबित्तिकै उनको मुटुले ढ्यांग्रो ठोक्न थाल्छ ।

९८ वर्षीय चन्द्रबहादुर अस्थानी भूमाफियाले जग्गा दाबी गरेको कुराले आफूहरू अचम्मित भएको बताउँछन् । आफ्नो हजुरबुबाको पालादेखि नै जोतभोग गर्दै आएको थातथलो अर्काले ‘हडप्न’ आएको देख्दा रुनु न हाँस्नु भएको उनले बताए । आफूले जीवनमै कल्पना नगरेको कुरा भोग्नुपरेको उनले गुनासो गरे । 

गम्भीर छानबिन हुनुपर्छ : वडाध्यक्ष खत्री
गाउँ नै उठीबास लाग्ने गरी भूमाफियाले ६५ बिघा क्षेत्रफल आफ्नो दाबी गरेको विषयमा थप बुझ्ने काम भइरहेको वडाध्यक्ष देवीबहादुर खत्रीले बताए ।

‘भूमाफियाको समूहले दाबी गरिरहेको ६५ बिघा कहाँ छ हामीलाई नै थाहा छैन,’ उनले भने, ‘यहाँका स्थानीय सदियौँदेखि बसेका हुन् । उनीहरू बसिरहेको जग्गाको कागजात माफियाले कसरी बनाए ? यो खोजीको विषय बनेको छ ।’

भूमाफियाको योजनाअनुसार स्थानीयको बिचल्ली बनाउने खेल देखिएको वडाध्यक्ष खत्रीले दाबी गरे । आइतबारको घटनापछि आक्रोशित स्थानीयले इलाका प्रहरी कार्यालय केश्वरगञ्ज घेराउसमेत गरेका थिए ।

‘भूमाफियाले देखाएको रेकर्ड स्रेस्तामै छैन’
मालपोत सेवा कार्यालय हरिवनले उक्त ठाउँमा भूमाफियाले देखाएजस्तो रेकर्ड नरहेको जनाएको छ । घटनालगत्तै स्थानीयले मौखिक रूपमा गराएको जानकारीअनुुसार आफूले रेकर्ड भिडाएर हेर्दा त्यस्तो कुनै जग्गा फेला नपरेको मालपोत कार्यालयका प्रमुख रमेश गौतमले बताए ।

त्यस्ता जग्गामा हदबन्दी मुद्दा रहने गरेको भए पनि सर्लाहीमा बाउ–छोराको अंशसम्बन्धी एउटा मुद्दा मात्र फेला परेको उनको भनाइ छ । कार्यालय प्रमुख गौतमका अनुसार उक्त स्थानमा केही अखडा जग्गा रहेको छ । त्यस्तो जग्गालाई सरकारी जग्गा भनिने भएकाले कसैको नाममा पास हुने सम्भावना नरहेको उनले जानकारी दिए ।

मालपोत प्रमुख गौतमले फेला परेको नक्सा र ढड्डा उतारको रेकर्डसमेत मालपोत कार्यालयबाट जारी भएको पाइएकाले त्यस विषयमा समेत अध्ययन भइरहेको बताए ।