- वि.सं २o७९ कार्तिक २९ मंगलबार
ज्योति लाइफ इन्स्योरेन्स कम्पनीको पाँचौँ वार्षिक साधारणसभाले सूर्या लाइफ इन्स्योरेन्स कम्पनीसँग मर्जरका लागि तय भएको स्वाप रेसियोलाई स्वीकृति प्रदान गरेको छ । पोखरामा भएको साधारणसभाले यी दुई कम्पनीबीच एकबराबर ०.८२४५ कित्ता सेयर आदान–प्रदान गर्ने प्रस्ताव पारित गरेको हो ।
यसका साथै साधारणसभाले मर्जर कार्यका लागि आवश्यक सम्पूर्ण जिम्मेवारी सञ्चालक समितिलाई दिने निर्णय पनि पारित गरेको जनाइएको छ । सभाले सञ्चालक समितिले प्रस्तुत गरेको आव ०७७/७८ को वार्षिक प्रतिवेदन छलफल गरी पारित गरेको कम्पनीले जनाएको छ । आव ०७७÷७८ को नाफा, नोक्सान, हिसाब, नगद प्रवाहलगायतका प्रस्ताव पनि पारित भएको जनाइएको छ ।
सभाले मर्जरपश्चात् सूर्यज्योति लाइफ इन्स्योरेन्स कम्पनीको नामकरण गर्ने प्रस्ताव पारित गरेको छ । त्यस्तै, मर्जर कार्यसँग सम्बन्धित प्रचलित कानुन, नियम, निर्देशिकाबमोजिम अपनाउनुपर्ने तथा गर्नुपर्ने सम्पूर्ण कार्य वा प्रक्रियामा पूरा गरी अन्तिम स्वीकृति लिने सम्पूर्ण कामको अख्तियारी सञ्चालक समितिलाई दिने प्रस्ताव पारित गरेको जनाइएको छ ।
मर्जरपछि बन्ने कम्पनीको सञ्चालक समितिका अध्यक्ष केशवप्रसाद भट्टराई हुने तय भएको छ । प्रमुख कार्यकारी अधिकृत भने ज्योति लाइफका प्रकाशविक्रम खत्री हुने सहमति भइसकेको तथा सूर्याका सिइओ पवनकुमार खड्का वरिष्ठ नायब प्रमुख कार्यकारी अधिकृत हुने कम्पनीले जनाएको छ ।
