नागरिक उन्मुक्ति विवाद : निर्वाचन आयोगले रञ्जितालाई नै कायम गर्‍यो अध्यक्ष

नागरिक उन्मुक्ति पार्टीका बहुमत केन्द्रीय सदस्यले राष्ट्रिय भेला बोलाएर अध्यक्ष परिवर्तन गरे पनि निर्वाचन आयोगले रञ्जिता श्रेष्ठलाई नै अध्यक्ष कायम गरेको छ । राष्ट्रिय भेलाले गत १५ साउनमा लालवीर चौधरीलाई अध्यक्ष चयन गरेको थियो । १४ साउनमा श्रेष्ठलाई अध्यक्षबाट हटाएको थियो ।

संरक्षक रेशम चौधरीसहितको उपस्थितिमा भएको भेलाको निर्णय अद्यावधिकका लागि निर्वाचन आयोगमा निवेदन दिइएको थियो । श्रेष्ठले पनि आधिकारिक अध्यक्ष आफू नै भएको र राष्ट्रिय भेला नबोलाइएको भन्दै निवेदन दिएकी थिइन् । ‘राजनीतिक दलसम्बन्धी ऐन र दलको विधान हेरेर श्रेष्ठ नै अध्यक्ष रहने निर्णय भएको छ,’ आयोगकी प्रवक्ता निता पोखरेल अर्यालले भनिन् । पार्टीको विधान र निर्णयहरू अध्ययन गर्दा लालवीरलाई अध्यक्षको मान्यता दिन मनासिब नदेखिएको आयोगले जनाएको छ । आयोगले रञ्जितालाई बोधार्थ दिएर लालवीरलाई पत्र पठाएको छ ।

आयोगले राष्ट्रिय भेलाको निर्णयलाई मान्यता नदिएपछि रेशम पक्ष आन्तरिक छलफलमा जुटेको छ । लालवीरले आफूहरू छलफलमा रहेको बताए । ‘हामी छलफलमै छौँ । अब कसरी जाने भन्ने निष्कर्षमा छिट्टै पुग्छौँ,’ उनले भने । श्रेष्ठले संवाद र छलफलबाट अगाडि बढ्ने बताइन् । ‘पार्टीमा सबैलाई मिलाएर लान्छु । अब एकढिक्का भएर पार्टी अगाडि बढ्छ,’ उनले भनिन्, ‘हामी उपनिर्र्वाचनको तयारीमा जुट्छौँ ।’

कार्यगत एकतामा अशोक–राजेन्द्र
अशोक राई नेतृत्वको जसपा र राजेन्द्र महतो नेतृत्वको राष्ट्रिय मुक्ति पार्टीले कार्यगत एकता गर्ने भएका छन् । दुई पार्टीबिच कार्यगत एकताको निर्णय भएको राईले बताए । ‘जसपा र राष्ट्रिय मुक्ति पार्टीबिच कार्यगत एकताको निर्णय भएको छ । बिहीबार घोषणासभा राखिएको छ,’ उनले भने ।

राईका अनुसार बिहीबार नयाँ बानेश्वरस्थित कृष्णभोग पार्टी प्यालेसमा कार्यगत एकता घोषणा कार्यक्रम राखिएको छ । पार्टी एकताउन्मुख कार्यगत एकता घोषणा गर्न लागिएको राष्ट्रिय मुक्ति पार्टीका महासचिव केशव झाले बताए । ‘निकट भविष्यमा पार्टी एकता गर्ने गरी कार्यगत एकताको निर्णय भएको हो,’ उनले भने ।

पछिल्लो समय राष्ट्रिय मुक्ति पार्टीसहित मधेशकेन्द्रित ६ दलले संघीय लोकतान्त्रिक मोर्चामार्फत विभिन्न सहरमा जागरण सभा गरिरहेका छन् । ती कार्यक्रममा जसपा भने सहभागी छैन । जसपा नेपालमा दुवै नेता एउटै कमिटीमा थिए ।

पार्टी विभाजन हुँदा महतो लोसपामा आबद्ध भएका थिए । लोसपा छाडेर महतोले राष्ट्रिय मुक्ति पार्टी गठन गरेका छन् भने राईले जसपा नेपाल विभाजन गरेर जसपा गठन गरेका छन् । राई एमाले र महतो सद्भावना पृष्ठभूमिका हुन् ।