बागमती प्रदेश सभाको हिउँदे अधिवेशन अन्त्य

बागमती प्रदेश सभाको दोस्रो कार्यकालको पाँचौँ अधिवेशन अन्त्य भएको छ। प्रदेश सरकारको सिफारिसमा प्रदेश प्रमुख दीपकप्रसाद देवकोटाले अधिवेशन अन्त्य गरेका हुन्।

प्रदेश प्रमुख देवकोटाले नेपालको संविधानको धारा १८३ को उपधारा २ बमोजिम प्रदेश सभाको चालू पाँचाैँ अधिवेशन अन्त्य गरेका हुन्। सोअनुसार प्रदेश सभाको हिउँदे अधिवेशन बुधबार राति ११ः५९ बजेबाट अन्त्य हुनेछ।

१८ माघबाट सुरु भएको हिउँदे अधिवेशनअन्तर्गत जम्मा चार दिनमा ६ वटा बैठक मात्रै बस्यो। १९ चैतमा बोलाइएको प्रदेश सभाको बैठक दलहरूबिचको असमझदारीका कारण दुईपटकसम्म सरेर अत्य गरियो।

बुधबार बिहान बसेको प्रदेश मन्त्रिपरिषद्को बैठकले प्रदेश सभाको चालू हिउँदे अधिवेशन अन्त्य गर्न सिफारिस गरेको थियो। संसद बैठक सञ्चालनका लागि मंगलबार बसेको सर्वदलीय बैठकले निष्कर्ष दिन नसकेपछि संसद् प्रभावित भएको थियो।

सरकारका प्रवक्ता एवं आन्तरिक मामिला तथा कानुनमन्त्री सुरजचन्द्र लामिछानेले प्रतिपक्षी दलहरूका कारण प्रदेश सभाको बैठक चल्न सक्ने अवस्था नरहेकाले अधिवेशन अन्त्यको निर्णयमा पुगेको तर्क गरे। उनले अब सरकार आगामी आर्थिक वर्षको नीति तथा कार्यक्रम र बजेट निर्माणमा केन्द्रित हुने बताए।