वनमन्त्री ठकुरी र सांसद गौतमद्वारा जडीबुटी प्रशोधन केन्द्रको निरीक्षण 

वनमन्त्री ऐनबहादुर शाही ठकुरी र काठमाडौं २ कि प्रतिनिधिसभा सदस्य सोविता गौतमले चैत १५ गतेको आन्दोलनमा जलाइएको जडीबुटी उत्पादन तथा प्रशोधन केन्द्रको निरीक्षण गरेका छन् । बिहीबार बिहान मन्त्री ठकुरी र रास्वपा सांसद गौतमले जडीबुटीस्थित प्रशोधन केन्द्र पुगेर जलेर भग्नावशेष भएका भौतिक संरचनाको अवलोकन गरेका हुन् । 

चैत १५ को राजावादी आन्दोलनका क्रममा प्रदर्शनकारीले आगो लगाउँदा प्रशोधन केन्द्र भग्नावशेष बनेको छ । गाडीहरू जलेका छन् । करोडौँको क्षति भएको छ । प्रशोधन केन्द्रकी महाप्रबन्धक संगीता यादवलगायत पदाधिकारीले आगलागीबाट क्षति भएको भग्नावशेषको अवलोकन गराउँदै क्षतिबारे जानकारी गराएका थिए । 

निरीक्षणपछि वनमन्त्री ठकुरीले छिटोभन्दा छिटो सञ्चालनमा लागि गृहकार्य भइरहेको बताए । ‘प्राविधिक र विज्ञ राखेर छलफल गरिरहेका छौँ । १० करोड भयो भने अस्थायी सञ्चालन हुन्छ भन्ने छ । क्याबिनेटमा छलफल भइसकेको छ । चाँडै रकम उपलब्ध हुन्छ,’ उनले भने । क्षतिको सहरी विभागले मूल्यांकन गरिरहेको र पुनर्निर्माण प्रक्रिया अगाडि बढ्ने उनको भनाइ थियो । ‘उत्पादन बढाउने र रोजगारलाई सुनिश्चित गर्ने सवालमा हामी सबै प्रक्रिया पूरा गरेर पुनः सञ्चालन गर्छौँ,’ उनले भने । 

सांसद गौतमले आगलागीबाट २८ करोडको क्षति देखिएको भन्दै आगो लगाउनेलाई कानुनी दायरामा सरकारले ल्याउनुपर्ने बताइन् । गौतमले प्रशोधन केन्द्रलाई घना बस्तीबाट सार्नुपर्ने पनि बताइन् । ‘जतिवेला स्थापना भयो, खुला ठाउँ थियो, अब घना बस्ती भइसकेकाले यहाँ उपयुक्त छैन भन्ने महसुस भएको छ । सरकारले उपयुक्त स्थानमा सार्नको लागि योजना बनाउनुपर्छ,’ उनले भनिन् । 

प्रशोधन केन्द्रकी महाप्रबन्धक यादवले नयाँ उत्पादनको तयारी गरिरहेका वेला आगो लाग्दा ठुलो क्षति भएको बताइन् । उनका अनुसार उद्योगको दुइटा भवन र १३ वटा गाडी जलेर क्षति भएको छ । २८ करोडको क्षति भएको छ । यादवले तत्कालका लागि १० करोड उपलब्ध भए सेवालाई नियमित गर्न सकिने बताइन् । सेवा नियमित गर्ने प्रयत्न भइरहेको छ । मन्त्रीज्यूले चाँडै आर्थिक प्याकेज घोषणा गर्छौँ भन्नुभएको छ । प्रशोधन केन्द्रलाई पुरानै अवस्थामा सञ्चालन गर्न प्रयासरत छौँ,’ उनले भनिन् । 

प्रशोधन केन्द्रका कर्मचारीले उत्पादन बन्द हुँदा बेरोजगार हुने चिन्ता व्यक्त गर्दै पहल गरिदिन सांसद गौतमलाई अनुरोध गरेका थिए ।