नवलपरासीका २७ जनालाई ८७ लाख ऋण दिएर तीन करोड २० लाख उठाएपछि पनि दुई करोड २६ लाख बाँकी देखाउने खुँखार मिटरब्याजी साहुकार जगदीश कानु बानियाँ पक्राउ परेका छन् । नवलपरासी प्रतापपुर गाउँपालिका– ९ का ५५ वर्षीय जगदीशलाई केन्द्रीय अनुसन्धान ब्युरो (सिआइबी)बाट खटिएको प्रहरी टोलीले सोमबार राति भारतबाट पक्राउ गरेको हो ।
सरकारले मिटरब्याज अपराध अध्ययनका लागि गठन गरेको उच्चस्तरीय कार्यदलका संयोजक डा. भीष्मकुमार भुसालले जगदीशलाई पक्राउ गरिएको बताए । ‘साहुकार जगदीश पक्राउ परेको सूचना मैले पाएको छु । यसको सबै अध्ययन तथा अनुसन्धान सिआइबीबाट भइरहेको छ । विस्तृत विवरण उहाँहरूले संकलन गर्नुभएको होला । अनुसन्धान प्रक्रिया निरन्तर अघि बढेको छ,’ उनले भने ।
जगदीशलाई महाराजगन्जस्थित सिआइबीको हिरासतमा राखेर विशेष अनुसन्धान भइरहेको छ । मंगलबार नै सिआइबीले जगदीशविरुद्ध पाँच पीडितको उजुरी पनि लिएको छ । नवलपरासी प्रतापपुर गाउँपालिका– ५ की खुसुनुव नेसा र रामकेवल चमार, सुस्ता गाउँपालिका– ५ का रामसुभग मुसहर र जयप्रकाश कुर्मी तथा प्रतापपुर–२ का रामसुरत गुप्ताले उजुरी दिएका हुन् । उनीहरूले जगदीशविरुद्ध ५० लाख रुपैयाँ बिगो दाबी गरेका छन् ।
कुल २७ पीडितले सिआइबीमा पेस गरेको विवरणअनुसार जगदीशले २७ ऋणीलाई विभिन्न मितिमा ८७ लाख ७ हजार रुपैयाँ ऋण दिएकोमा तीन करोड २० लाख १३ हजार ८ सय असुलिसकेका छन् । तर, उनले कुनै पनि ऋणीको दृष्टिबन्धकमा राखिएको जमिन फिर्ता गरेका छैनन् । बरु उनीहरूसँग उल्टै थप दुई करोड २६ लाख ५० हजार मागेका छन् ।
दुई दिनमा तीन मिटरब्याजी पक्राउ
सोमबार राति साहुकार जगदीशसँगै अर्का साहुकार लालबहादुर खड्कालाई पनि सिआइबीले पक्राउ गरेको छ । काठमाडौं गोलढुंगाका लालबहादुरविरुद्ध नवलपरासी बर्दघाट नगरपालिका– १४ का मानबहादुर थापा र कुलबहादुर थापाले उजुरी दिएका छन् । उनीहरूले दृष्टिबन्धकमा रहेको आफ्नो जग्गा फिर्ता गर्न भन्दै उनीविरुद्ध उजुरी दिएका हुन् ।
डिआइजी टेकप्रसाद राई, प्रवक्ता, नेपाल प्रहरी
मिटरब्याजीविरुद्ध उजुरी पर्ने क्रम जारी छ । उनीहरूविरुद्ध प्रहरीले कारबाही तीव्र पारेको छ । कोही फरार छन् । खोजी कार्यलाई पनि प्रहरीले तीव्र बनाएको छ ।
मानबहादुरका अनुसार लालबहादुरले आठ वर्षअघि आफूलाई दुई लाख रुपैयाँ ऋण दिँदा साढे नौ लाखको तमसुक बनाई नौ कट्ठा जमिन पनि दृष्टिबन्धनका राखेका थिए । तर, उनीसँग लिएको ऋण वर्ष दिनमै चुक्ता गरे पनि न साढे नौ लाखको तमसुक च्यातिएको छ, न दृष्टिबन्धकको जग्गा फिर्ता नै भएको छ । त्यस्तै, कुलबहादुरले पनि आठ वर्षअघि नै दुई लाख ऋण लिएका थिए । उनका अनुसार त्यतिवेला नौ कट्ठा जमिन पनि दृष्टिबन्धकमा राखेका थिए । तर, लिएको ऋण चुक्ता गरेर जग्गा फिर्ता गर्न खोज्दा साहुकार लालबहादुरलाई भेट्नै नसकेको उनको गुनासो छ ।
प्रहरीले शनिबार महोत्तरीका साहुकार अनिरुद्ध साहलाई उनकै निवासबाट पक्राउ गरेको थियो । महोत्तरी जिल्ला प्रहरी कार्यालयका प्रमुख एसपी कृष्ण पंगेनीका अनुसार उनीविरुद्ध १३ उजुरी तथा निवेदन दर्ता भएको छ । प्रहरीले उनीसँग ७१ लाखको जाली तमसुक पनि फेला परेको छ ।
नेपाल प्रहरीका केन्द्रीय प्रवक्ता डिआइजी टेकप्रसाद राईले मिटरब्याजीविरुद्धको कारबाहीलाई प्रहरीले तीव्रता दिएको बताए । उनले भने, ‘मिटरब्याजीविरुद्ध उजुरी पर्ने क्रम जारी छ । उनीहरूविरुद्ध प्रहरीले कारबाही तीव्र पारेको छ । कोही फरार छन् । खोजी कार्यलाई पनि प्रहरीले तीव्र बनाएको छ,’ उनले भने ।
साहुकारविरुद्ध सबैभन्दा धेरै ४२७ उजुरी सर्लाहीमा
सरकारले गठन गरेको मिटरब्याज अपराध अध्ययनसम्बन्धी उच्चस्तरीय कार्यदलका अनुसार साहुकारविरुद्ध सबैभन्दा धेरै उजुरी सर्लाहीमा परेका छन् । मंगलबारसम्म सर्लाहीमा मात्रै साहुकारविरुद्ध चार सय २७ उजुरी परेका हुन् । त्यसपछि सबैभन्दा धेरै उजुरी सिराहामा परेका छन् । सिराहामा मात्रै मंगलबारसम्म दुई सय ८९ उजुरी दर्ता भएको गृह मन्त्रालयको भनाइ छ । त्यस्तै, महोत्तरीमा एक सय ९१, धनुषामा एक सय ४०, सप्तरीमा एक सय १४ उजुरी परेका छन् । सबैभन्दा धेरै उजुरी पर्ने पाँचै जिल्ला मधेस प्रदेशका हुन् । साहुकारबाट गाउँ नै उठीबासमा परेको नवलपरासी पश्चिम र पूर्वमा पनि साहुकारविरुद्ध धेरै उजुरी परेका छन् । तथ्यांकअनुसार नवलपरासी पश्चिममा एक सय २ र नवलपरासी पूर्वमा ३५ उजुरी परेका छन् ।
काठमाडौं उपत्यकामा पनि सर्वसाधारणका १५३ उजुरी
चर्को ब्याजदरमा रकम लगाई सर्वसाधारणलाई उठीबास लगाउने काठमाडौं उपत्यकाभित्रका मिटरब्याजीविरुद्ध पनि उल्लेख्य उजुरी परेका छन् । गृहका अनुसार सबैभन्दा धेरै एक सय ४१ उजुरी जिल्ला प्रशासन कार्यालय काठमाडौंमा दर्ता भएका छन् । त्यस्तै, भक्तपुर र ललितपुरमा भने ६–६ वटा उजुरी परेका छन् ।
३८ जिल्लाबाट परे १९ सय ६४ उजुरी
उदयपुर : १, झापा : २१, मोरङ : ३७, सुनसरी ३३, सप्तरी : ११४, सिराहा : २८९, धनुषा : १४०, महोत्तरी : १९१, सर्लाही : ४२७, रौतहट : ४१, बारा : ४५, पर्सा : ८३, दोलखा : २, सिन्धुली : २, काभ्रेपलाञ्चोक : १८, धादिङ : २, चितवन १६, मकवानपुर : ९, भक्तपुर : ६, ललितपुर : ६, काठमाडौं : १४१, तनहुँ : ५, कास्की : २४, स्याङ्जा : २, म्याग्दी : १, पर्वत : ३, नवलपरासी (सुस्ता पूर्व) : ३५, रूपन्देही : २९, अर्घाखाँची : १, दाङ : ४८, बाँके : १५, नवलपरासी (सुस्ता पश्चिम) : १०२, बर्दिया : ८, सल्यान : ११, सुर्खेत : ११, कैलाली : ४३ र कञ्चनपुर : २
