सरसामान खरिद गर्दा पातला प्लाष्टिक झोला बोक्ने गर्नुभएको छ भने आजबाट त्यो बानी हटाउनुहोला । किनभने, सरकारले आज अर्थात भदौ १ बाट ४० माइक्रोनभन्दा कमको प्लास्टिक झोला प्रतिबन्ध लगाएको छ ।
वन तथा वातावरण मन्त्रालयअन्तर्गतको वातावरण विभागले १ भदौबाट प्लाष्टिकजन्य पदार्थबाट हुने वातावरणीय प्रदुषण न्यूनीकरण गर्न ४० माइक्रोनभन्दा पातलो प्लाष्टिकको उत्पादन, आयात, बिक्री वितरण र प्रयोगमा पूर्णरूपमा प्रतिबन्ध लगाएको हो ।
विभागले सूचनामार्फत् प्लाष्टिकका झोला प्रतिबन्धको नीति तथा निर्णयलाई आगामी दिनमा थप कडाइका साथ लागू गर्ने तयारी गरेको जनाएको छ । त्यस्तो उत्पादन, आयात, बिक्री विरतरण तथा प्रयोगको अवस्थाबारे अनुगमन गर्ने र उलंघन भएको पाइए कारबाही गर्ने विभागको भनाइ छ ।
‘भदौ १ बाट ४० माईक्रोनभन्दा पातलो प्लाष्टिक झोला उत्पादन, आयात, बिक्री वितरण तथा प्रयोगको अवस्थालाई कडाईका साथ अनुगमन गरिने र अनुगमनका समयमा नेपाल सरकारको निर्णय विपरितका कार्य भएको पाइएमा वातावरण संरक्षण ऐन, २०७६ र वातावरण संरक्षण नियमावली, २०७७ बमोजिम कारबाही हुने छ,’ विभागले भनेको छ ।
सरकारले यसअघि १९ असोज ०७८ मा नेपाल राजपत्रमा सूचना प्रकाशन गरी ४० माइक्रोनभन्दा पातलो प्लाष्टिक झोला उत्पादन, आयात, बिक्री वितरण तथा प्रयोगमा प्रतिबन्ध लगाएको थियो । त्यसलाई प्रभावकारी कार्यान्वयनका लागि गत माघमा मन्त्रिपरिषद्ले प्लाष्टिक झोला प्रतिबन्ध सम्बन्धी कार्ययोजना, २०७८ स्वीकृत गरिसकेको छ । तर, कोरोना महामारीका कारण पर्याप्त अुनगमन नहुँदा सरकार कारबाहीमा उत्रिएको थिएन ।
