लक्ष्मी क्यापिटल लिमिटेडले बिहीबारदेखि सर्वसाधारण लगानीकर्ताका लागि ‘शुभलक्ष्मी कोष’ नामक खुलामुखी म्युचुअल फन्ड निष्कासन तथा बिक्री खुला गरेको छ । क्यापिटलले लक्ष्मी म्युचुअल फन्डअन्तर्गत सञ्चालन हुने गरी प्रतिइकाइ १० रुपैयाँ अंकितदरका ५० करोड रुपैयाँबराबरको पाँच करोड इकाइ निष्कासन गर्न लागेको हो ।
जसमध्ये १५ प्रतिशत इकाइ कोष प्रवद्र्धक लक्ष्मी बैंकले बिज पुँजीको रूपमा लगानी गर्ने जनाइएको छ । बाँकी रहेको चार करोड ७५ लाख इकाइमध्ये पहिलो चरणमा सर्वसाधारणका लागि एक करोड ७५ लाख इकाइ बिक्री खुला गरेको क्यापिटलले जनाएको छ ।
सर्वसाधारण लगानीकर्ताले न्यूनतम एक सय इकाइदेखि अधिकतम ५० लाख इकाइसम्म आवेदन दिन सक्ने जनाइएको छ । साउन १९ बिहीबारबाट निष्कासन हुने यो फन्डमा लगानीकर्ताले छिटोमा साउन २३ गतेसम्म र ढिलोमा भदौ २ गतेसम्म धितोपत्रबोर्डबाट आस्बा अनुमति लिएका बैंक तथा वित्तीय संस्था तथा मेरो सेयरबाट पनि आवेदन दिन सक्नेछन् । बिक्री प्रबन्धकको कार्य लक्ष्मी क्यापिटल लिमिटेडले गर्ने जनाइएको छ ।
