नेपाल इन्भेष्टमेन्ट बैंक लिमिटेडको पूर्ण स्वामित्वमा रहेको एनआइबिएल एस क्यापिटल लिमिटेडले स्थापनाको १० वर्ष पूरा भएको अवसर पारेर विभिन्न योजना ल्याएको छ । कम्पनीले ग्राहकलाई विभिन्न सुविधा दिने एक महिना लामो योजना ल्याएको हो ।
योजनाअनुसार कम्पनीले डिम्याटको वार्षिक नवीकरण शुल्कमा १० वर्षको अग्रिम भुक्तानीमा थप १० वर्ष निःशुल्क नवीकरण गर्ने योजना ल्याएको जनाइएको छ । त्यस्तै, १० रुपैयाँमै मार्केट एक्सपर्टको सुविधा दिने कम्पनीले जनाएको छ । क्यापिटलले व्यवस्थित लगानी योजनाको धन्यवाद अफरअन्तर्गत लगानीकर्तामध्ये १० जना भाग्यशालीलाई १० हजारबराबरको इकाइ प्रदान गरिने जनाइएको छ । त्यस्तै, व्यवस्थित लगानी योजनामा दर्ता हुने बालबालिकालाई बास्केट अफ ह्यापिनेसअन्तर्गत उपहार प्रदान गरिने क्यापिटलले जनाएको छ ।
कम्पनीले आफ्नो १० वर्षे कार्यकालमा यस एक सय ८८ कम्पनीको आइपिओ तथा विभिन्न कम्पनीको हकप्रद सेयर निष्कासनका लागि निष्कासन तथा बिक्री प्रबन्धकका रूपमा समेत कार्य गरेको जनाएको छ । हाल क्यापिटलले ५१ कम्पनीको सेयर रजिस्ट्रारका रूपमा काम गरिरहेको छ ।
क्यापिटलले योजना व्यवस्थापक रही एनआइबिएल म्युचुअल फन्डअन्तर्गत तीनवटा बन्दमुखी र एक खुलामुखी म्युचुअल फन्ड योजनाहरू सञ्चालनमा ल्याइसकेको जनाएको छ । जसमध्ये एनआइबिएल समृद्धि फन्ड–१ परिपक्व भई आफ्ना इकाइधनीलाई रकमसमेत फिर्ता गरिसकेको उल्लेख छ । साथै, नयाँ बन्दमुखी योजना एनआइबिएल ग्रोथ फन्ड नेपाल धितोपत्र बोर्डमा पेस भई प्रारम्भिक समीक्षाको चरणमा रहेको जनाइएको छ ।
कम्पनीले सात सयभन्दा बढी लगानीकर्तालाई लगानी व्यवस्थापन सेवा प्रदान गर्दै आइरहेको तथा आफ्नो संस्थागत परामर्श सेवाअन्तर्गत ३४ कम्पनीलाई सेवा प्रदान गर्दै आइरहेको जनाएको छ । त्यस्तै, तीन लाख ग्राहकलाई डिम्याट खाता तथा दुई लाख २५ हजार ग्राहकलाई मेरो सेयर सेवासमेत प्रदान गर्दै आइरहेको जनाएको छ ।
