किराको प्रकोप राेक्न कृषि प्राविधिक टोलीको सल्लाह अनुसार धानवालीमा विषादी राखिदै
लमजुङमा असार पहिलो साता रोपेको धानबालीमा काँडेदार खपटे किराको प्रकोप देखिएको छ । बेसीशहर नगरपालिका ११ रामचोक फाटमा धानमा किरा लागेसँगै किसानहरु चिन्तित भएका छन् ।
रामचोक फाँटमा राईस हिस्पा (काँडेदार खपटे) किराको प्रकोप बढेपछि कृषि प्राविधिक टोलीको सल्लाह अनुसार धानवालीमा विषादी छर्किएको छ । कृषि ज्ञान केन्द्र र बेसीशहर नगरपालिका कृषि शाखाका प्राविधिक टोलीले सोमवार अनुगमन गरेर विषादी प्रयोगका बारेमा जानकारी गराएका हुन् ।
किराको प्रकोप नियन्त्रणका लागि आवश्यक विषादी केन्द्रमा नभएकाले नगरपालिकाको सहयोगमा किसानहरुलाई विषादी उपलव्ध गराइएको छ । फाँटको करिव एकसय रोपनी धानवालीमा किराको प्रकोप देखिएको र मंगलवार करिव ५० रोपनीमा विषादी हालिएको ज्ञान केन्द्रले जानकारी दिएको छ ।
खपटे किराको प्रकोपले भर्खर रोपेका कलिला धानको पात खाएर विरुवा नै सुक्ने, किराले धानको गुभो खान लागेपछि धानबाली नष्ट हुने भएकाले किसानहरु चिन्तित भएका छन् ।
केन्द्रका कृषि प्रसार अधिकृत किरण सापकाेटाले फाँटमै पुगेर धानवाली अवलोकन गरी किरा प्रकोप र यसका उपचार विधिका बारेमा किसानलाई जानकारी गराएका थिए ।
