लमजुङको बेँसीसहर नगरपालिकाले आगामी आर्थिक वर्षका लागि ७५ करोड ५३ लाख तीन हजारको अनुमानित बजेट प्रस्तुत गरेको छ । नगरपालिकाका उपप्रमुख पदमा गुरुङले ११औँ नगरसभामा आर्थिक वर्ष ०७९/०८० का लागि बजेट प्रस्तुत गरेकी हुन् ।
नगरसभालाई गण्डकी प्रदेशका संस्थापक मुख्यमन्त्री एवं एमालेका उपमहासचिव पृथ्वीसुब्बा गुरुङले सम्बोधन गरेका थिए । नगरपालिकाले आगामी आर्थिक वर्षको बजेट चालू आर्थिक वर्षको भन्दा दुई करोड ८७ लाख ६२ हजार अर्थात् ३ दशमलव ९३ प्रतिशतले बढी प्रस्तुत गरेको बेँसीसहर नगरपालिकाका प्रमुख गुमानसिंह अर्यालले बताए ।
नगरपालिकाले चालुतर्फ १३ करोड अर्थात् १७ दशमलव २१ प्रतिशत बजेट विनियोजन गरेको छ। पूँजीगततर्फ २५ करोड ९४ लाख तीन हजार अर्थात् ३४ दशमलव ३४ प्रतिशत बजेट विनियोजन गरेको छ ।
आगामी आर्थिक वर्षका लागि आन्तरिक स्रोत तथा स्थानीय राजश्वबाट आठ करोड ५६ लाख ८१ हजार, संघीय र प्रदेश राजश्व बाँडफाँडबाट १३ करोड ५० लाख ७२ हजार, संघीय र प्रदेश समानीकरण अनुदानबाट १६ करोड ८६ लाख ५० हजार, संघीय र प्रदेश सशर्त, समपुरक र विशेष अनुदानबाट ३६ करोड ५९ लाख बजेट प्रस्तुत गरिएको छ ।
