जिल्ला समन्वय समिति मोरङमा एमालेको प्यानल नै विजयी भएको छ। मंगलबार सम्पन्न निर्वाचनबाट एमालेका अजम्बर राई जिसस प्रमुख तथा उषा झा उपप्रमुख निर्वाचित भएका हुन्।
प्रमुखमा राई र उपप्रमुखमा झा समान २१/२१ मतसहित निर्वाचित भएका हुन्। १७ पालिका भएको मोरङमा एमालेका २१ तथा कांग्रेसका १२ र माओवादी केन्द्रका एक गरी १३ मतदाता थिए। कांग्रेसका २ र माओवादी केन्द्रका एकजनाले आफ्नो प्यानलको उम्मेदवारलाई मत नदिएकाे बुझिएको छ। सदस्यमा निर्वाचित एमालेकी उमा नेपालीले २३ र मित्रप्रसाद ढकालले २२ मत प्राप्त गरेका छन्।
एमालेबाट सदस्यमा निर्वाचित नेपाली र ढकालको मत बढी आउँदा कांग्रेसका उम्मेवारको मत कम भएको छ। सदस्यहरूमा तुलसीप्रसाद घिमिरे, देवमणि कटुवाल, उर्वशीकुमारी थारू र हरिमाया विश्वकर्मा निर्वाचित भएका छन्। नेपाली कांग्रेसबाट समन्वय समितिको प्रमुखमा जितेन्द्र अग्रवाल र उपप्रमुखमा निलमकुमारी सरदार उम्मेदवार बनेका थिए।
