दोलखाको चरिकोट जिरी सडकखण्डअन्तर्गत गौरीशंकरवाल गृहनजिकै गाडी र मोटरसाइकल ठोक्किँदा मोटरसाइकलचाललको मृत्यु भएको छ। भीमेश्वर नगरपालिका– ४ अनाथालयनजिकै विपरीत दिशाबाट आइरहेको मोटरसाइकललाई गाडीले ठक्कर दिँदा सोही वडाका ३३ वर्षीय मोटरसाइकलचालक उमेश श्रेष्ठको मृत्यु भएको जिल्ला प्रहरी कार्यालयले जनाएको छ।
चरिकोटबाट तामाकोसीतर्फ जाँदै गरेको प्रदेश नं ३–०१०२४ च ५९१९ नम्बरको योद्धा गाडी रजिलुबाट चरिकोट आउँदै गरेको बा.७५ प ४५२१ नम्बरको मोटरसाइकलसँग ठोक्किएर घाइते श्रेष्ठलाई चरिकोटस्थित पशुपति चौलागाईं स्मृति अस्पतालमा पुर्याइएको र उपचारका क्रममा उनलाई मृत घोषणा गरिएको थियो।
गाडीसहित चालकलाई प्रहरीले नियन्त्रणमा लिई अनुसन्धान गरिरहेको जिल्ला प्रहरी कार्यालयका प्रहरी निरीक्षक सुशील केसीले बताए। मृतकको शव हाल सोही अस्पतालमा राखिएको छ। रासस
See More On
