सत्तासाझेदार नेकपा (एकीकृत समाजवादी)का सम्मानित नेता एवं पूर्वप्रधानमन्त्री झलनाथ खनालले स्थानीय तहको निर्वाचनको परिणामपछि आफ्नो पार्टी सत्तारुढ गठबन्धनभित्र धेरै असन्तुष्ट रहेको बताएका छन् । शनिबार पार्टीको सचिवालय बैठकपछि सञ्चारकर्मीहरूले राखेका जिज्ञासाको जवाफ दिने क्रममा खनालले सम्मानजनक ढंगले गठबन्धन हुँदै नभएको जिकिर गरे ।
उनले आफूहरूको असन्तुष्टि सत्तारुढ दलहरुको बैठकमा राखिएको र आन्तरिक रूपमा पनि छलफल गरेर एउटा निष्कर्षमा पुग्ने प्रतिक्रिया दिए । फरक प्रसंगमा खनालले तत्काल वामपन्थी दलहरूबीचको एकताको आवश्यक्ता औँल्याउँदै त्यो सम्भावना भने अहिलेलाई निकै कमजोर रहेको बताए ।
उनले, ‘वामपन्थीहरूबीच एकता हुनु वस्तुगत आवश्यकता हो । तर यतिबेला वामपन्थी आन्दोलनका मुख्य नेताहरू अहिले वामपन्थी एकताको पक्षमा देखिनुहुन्न । यसो हुनाले तत्काल वामपन्थी एकताको आवश्यकता भए पनि त्यो सम्भावना निकै कमजोर छ । हामी स्थानीय तहको निर्वाचनबाट धेरै असन्तुष्ट छौँ। किनभने यो पाँच दलको गठबन्धनभित्र सम्मानजनक ढंगले गठबन्धन हुँदै भएन । हाम्रो असन्तुष्टि पाँचदलभित्र पनि राखेका छौँ। हामी आफैँ पनि समीक्षा गर्दै छौंँ। अब हामी ठ्याक्कै यो समीक्षाको बीचमा छौँ । समीक्षा गरिसकेपछि अब के के निस्कन्छ, त्यस आधारमा हामी तपाईंहरूसँग फेरि कुरा गर्छाैँ ।’
