अर्थमन्त्री जनार्दन शर्माले सरकारले प्रस्तुत गरेको आगामी आर्थिक वर्षको बजेटमा चुनावसँग सम्बन्धित कुनै पनि कुरा नभएको दाबी गरेका छन् । सोमबार बजेटबारे अर्थ मन्त्रालयमा आयोजित पत्रकार सम्मेलनमा बोल्दै अर्थमन्त्री शर्माले उत्पादन वृद्धि गर्ने, आत्मनिर्भर अर्थतन्त्र बनाउने, तलब वृद्धि गर्नेल गायतका कुनै पनि विषयहरू चुनावसँग सम्बन्धि छ भनेर भन्न नमिल्ने स्पष्टोक्ति दिएका हुन् ।
उनले चार वर्षअघिको सरकारले ल्याएको कार्यक्रमलाई पनि बजेटले निरन्तरता दिएको उल्लेख गर्दै त्यसलाई पनि चुनावी बजेट भन्न मिल्छ र ? भनी प्रश्नसमेत गरे । ‘यो चुनावी बजेट हो भनिएको छ । यहाँ चुनावको कुरा छैन कहीँ पनि । हिजो दिइरहेको कुरा निरन्तर गरिएको हो । अलिकति तलमाथि गरेकोबाहेक के चुनावी गरिएको छ र ? उत्पादन वृद्धि गर्ने कुरा चुनावी कुरा हो र ? आत्मनिर्भर हुनुपर्छ भन्ने कुरा चुनावी कुरा हो र ? तीन वर्षको स्वतः तलब बढाउने कुरा थियो कर्मचारीहरूको । ऐनमै त्यसको व्यवस्था छ । तलब बढाउनु चुनावी कुरा होइन । तालिम दिनुपर्छ युवाहरूलाई भन्ने कुरा चुनावको कुरा हुँदैन । किसानलाई पेन्सन दिने कुरा पनि चुनावी कुरा होइन । यो चुनावी कुरा होइन, उत्पादन बढाउने कुरा हो,’ अर्थमन्त्री शर्माले भने, ‘यसलाई चुनावी बजेट भनियो, यो चुनावी बजेट होइन । विगतकै बजेटको पनि निरन्तरता धेरै छन् । तीन चार वर्षअघिको सरकारले बनाएको बजेट पनि चुनावी बजेट हो त ?’
अर्थमन्त्री शर्माले सरकारको प्रस्तुत गरेको नीति तथा कार्यक्रमअनुसार नै बजेट आएको पनि स्पष्ट पारे । उनले आगामी आर्थिक वर्षको बजेटमा रोजगारी सिर्जना गर्ने, गरिबीको अन्त्य गर्ने, स्रोत तथा साधनहरूको सही परिचालन र व्यवस्थापन गर्नेजस्ता विषयहरू बजेटमा समेटिएको बताए । उनले स्वदेशी वस्तुको प्रयोग सरकारबाटै सुरु गर्ने विषयलाई बजेटमा उच्च प्राथमिकता दिइएको बताए । अर्थ मन्त्रालयमा प्रयोग गरिएको सेनिटाइजरसमेत विदेशी भएको पाइएकाले पनि आफूहरूले स्वदेशी वस्तुको प्रयोगमा जोड दिने निष्कर्ष निकालिएको उनको भनाइ छ । ‘सेनिटाइजर स्वदेशी आओस् । मास्क पनि स्वदेशी आओस् । सुरु कसले गर्ने त ? पहिला सरकारले गर्नुपर्यो । सरकारमा बस्ने पहिले हामीले नै सुरु गर्नुपर्यो । त्यसो गर्ने प्रतिबद्धता हामीले गरेका छौँ र, हामीसँग धागो कारखाना छ । कपडा उद्योग छ । प्राइभेट धागो कारखाना छ । तिनलाई पनि सहुलियत दिँदै छौँ । तिनलाई हामी सुविधा दिँदै छौँ । बिजुलीमा सुविधा दिन्छौँ हामी । निर्यात गर्दा नगद इन्सेन्टिभ दिन्छौँ । त्यसबाट हामी उनीहरूलाई उत्साहित गर्न खोजिराखेका छौँ । टायर उद्योग, रबर उद्योग त्यत्तिकै छ । त्यसलाई बेच्नुपर्ने अवस्था छ,’ उनले भने ।
मन्त्री शर्माले सरकारले ल्याएको आगामी आर्थिक वर्षको बजेट पूर्ण रूपमा कार्यान्वयन हुने दाबीसमेत गरे । उनले बजेटमा निर्माण व्यवसायीलगायतका केही विषयहरू छुटेको कुरा बाहिर आएको उल्लेख गर्दै त्यसलाई समेटेर अघि बढ्ने प्रतिबद्धतासमेत व्यक्त गरे । अर्थमन्त्री शर्माले बजेट पूर्ण र उत्कृष्ट नभए पनि देश र जनताको आकांक्षालाई सम्बोधन हुने गरी आएको बताए ।
‘यो पूर्ण छ ?, उत्कृष्ट छ ?, होइन । राम्रो गरौँ भनेर कोसिस गरिएको छ । कुनै क्षेत्र छुटेको होला । कुनैमा ध्यान नपुगेको पनि होला । त्यसका लागि पनि हामी क्षमाप्रार्थी छौँ । हाम्रो टिमले जति सक्यो, त्यति गर्यौँ,’ उनले भने, ‘हामीलाई के विश्वास छ भने यसलाई कार्यान्वयन पनि गर्न सक्छौँ हामी ।’ अर्थमन्त्री शर्माले बजेटले आयात प्रतिस्थापन गर्ने, स्वदेशी उत्पादनमा जोड दिने, रोजगारीको अवसर सिर्जना गर्ने कामलाई प्राथमिकता दिएको पनि दाबी गरे ।
