उत्तरी गोरखाको मनास्लु क्षेत्रमा पर्यटक आगमन बढ्न थालेसँगै पर्यटन व्यवसायीहरू खुसी भएका छन् । कोभिडका कारण लामो समयदेखि पर्यटक आउन छाडेपछि धराशायी बनेका व्यवसायीमा अहिले पर्यटन आगमन बढ्न सुरु गरेसँगै खुसी बढेको हो । कोभिडका कारण दुई वर्षसम्म मनास्लु क्षेत्रका होटेल, लज, टि–हाउसहरू सुनसान थिए । अहिले मनास्लु क्षेत्रको चुम उपत्यका र नुब्री उपत्यकाका होटेल, लज तथा टी–हाउस सञ्चालनमा आएसँगै व्यवसायीहरू खुसी भएका मनास्लु क्षेत्र होटेल व्यवसायी उपसमितिका अध्यक्ष गणेश कार्कीले बताए । उनले भने, ‘लामो समयदेखि सबै होटेल बन्द हुँदा लाखाैँ, करोडौँ लगानी खेर जाने आवस्थामा पुगेको थियो । तर, अहिले केही मात्रामा भए पनि पर्यटकहरू आउन थालेका छन् ।’
मनास्लु संरक्षण क्षेत्र आयोजना (एमक्याप)का अजित तुम्बाहाम्फेका अनुसार अहिले मनास्लु क्षेत्रअन्तर्गत चुम र नुब्री उपत्यकामा दैनिक २०–२५ जनाका दरले पर्यटक आउने गरेका छन् । यो सिजनको हालसम्ममा एक सय ६ जना मनास्लु क्षेत्र प्रवेश गरेको उनले बताए । अघिल्लो एक वर्षमा आएका जति पर्यटक यस वर्षको तीन महिनामै आएको उनले जानकारी दिए । उनीहरूमध्ये ३३ जना चुम उपत्यका र ७३ जना मनास्लु उपत्यकातर्फ गएको तुम्बाहाम्फेले बताए ।
विदेशी पर्यटकहरू आएसँगै अक्टोबर सिजनका लागि पनि धमाधम बुकिङ आएको खबरले व्यवसायीहरू उत्साहित बनेको सामागाउँका व्यवसायी मिङमार लामाले बताए । मनास्लु आरोहणका लागि आरोहीहरू आउन सुरु गरेको उनले जानकारी दिए । चुम उपत्यकाका होटेल व्यवसायी ङवाङ सोनाम लामाले पनि कोभिडबाट निराश भएका व्यवसायीहरू पर्यटक आउन थालेपछि खुसी भएको बताए । लाखाँै, करोडौँ खर्च गरेर होटेल व्यवसाय सञ्चालन गरिरहेका व्यवसायीहरू पर्यटक आउन थालेसँगै धमाधम आफ्नो व्यवसाय सुरु गर्न थालेको उनको भनाइ छ ।
