वैशाख ३० गते हुने स्थानीय तहको निर्वाचनका लागि एमालेले लमजुङमा चार नगरपालिका र चार गाउँपालिकाको प्रमुख र उपप्रमुख उम्मेदवार टुंग्याएको छ । चारवटा नगरपालिका र चारवटा गाउँपालिका गरी ७५ वटा वडा रहेको लमजुङमा एमालेले सोमबार आठवटै स्थानीय तहको प्रमुख र उपप्रमुख उम्मेदवार चयन गरेको हो । लमजुङको सदरमुकाममा रहेको बेँसीसहर नगरपालिकामा हालका मेयर गुमानसिंह अर्याल नै दोहोरिने भएका छन् ।
बेँसीसहर नगरपालिकाको उपमेयरमा पद्मा गुरुङलाई चयन गरिएको छ । यस्तै, लमजुङको राइनास नगरपालिकामा पनि हालका मेयर सिंहबहादुर थापालाई दोहोर्याइएको छ । उपमेयरमा शोभा पन्थीले टिकट पाएकी छिन् । मध्यनेपाल नगरपालिकामा हालका उपप्रमुख राजकुमार श्रेष्ठलाई मेयरमा चयन गरिएको छ भने उपमेयरमा सीता गुरुङलाई चयन गरिएको छ ।
जिल्लाको सुन्दरबजार नगरपालिकामा मेयरमा भीमबहादुर गुरुङ र उपमेयरमा भवनी केसीलाई चयन गरिएको एमाले लमजुङले जनाएको छ । यस्तै, चार गाउँपालिका रहेको लमजुङको मर्स्याङ्दी गाउँपालिकामा हालका अध्यक्ष अर्जुन गुरुङलाई अध्यक्षमा चयन गरिएको छ भने उपाध्यक्षमा जुना थापालाई चयन गरिएको छ । दोर्दी गाउँपालिकाको अध्यक्षमा युवराज अधिकारी र उपाध्यक्षमा उषा गुरुङ रहेका छन् भने क्वोहोलासोथर गाउँपालिकाको अध्यक्षमा सूर्य गुरुङ र उपाध्यक्षमा गमी गुरुङलाई चयन गरिएको छ ।
यस्तै, लमजुङको दूधपोखरी गाउँपालिकाको अध्यक्षमा तेजबहादुर गुरुङ र उपाध्यक्षमा कृष्णमाया गुरुङलाई चयन गरिएको छ । एमालेले ०७४ मा भएको स्थानीय तहको निर्वाचनमा लमजुङको तीन नगरपालिकाको प्रमुख र दुई गाउँपालिकाको प्रमुख जितेको थियोे भने दुई नगरपालिकाको उपप्रमुख र दुई गाउँपालिकाको उपप्रमुख जितेको थियो ।
