नेपाल खेलकुद पत्रकार मञ्चले प्रत्येक वर्ष आयोजना गर्ने खेलकुद क्षेत्रको प्रतिष्ठित अवार्ड ‘एनएसजेएफ–पल्सर स्पोर्टस् अवार्ड २०७७ को पिपल्स च्वाइस अवार्डतर्फका मनोनीत खेलाडी आइतबार सार्वजनिक गरिएको छ । मञ्चले एक कार्यक्रमबीच यस विधामा मनोनीत भएका पाँचजना खेलाडी सार्वजनिक गरेको हो । विधामा एथलेटिक्सकी सन्तोषी श्रेष्ठ, फुटबलकी एन्जिला तम्बापो सुब्बा, टेबुल टेनिसबाट एलिना महर्जन, क्रिकेटका कुशल भुर्तेल तथा ब्याडमिन्टनका प्रिन्स दाहाल रहेका छन् । पिपल्स च्वाइस विधाका विजेताको घोषणा खेल पत्रकार, राष्ट्रिय प्रशिक्षक र समर्थकको भोटिङबाट चुनिनेछ ।
मञ्चले गत वर्षजस्तै भोटिङका लागि विद्युतीय भुक्तानी गर्न चर्चित र विश्वासिलो सेवाप्रदायक कम्पनी ई–सेवासँग प्रायोजन सम्झौता गरेको छ । ब्याडमिन्टनका प्रिन्स विश्व जुनियरको वरीयतामा शीर्ष स्थानमा छन् । यसै वर्ष उनले घरेलु ब्याडमिन्टनमा पनि दबदबा राख्दै सिन्धुपाल्चोकमा सिनियर खेलाडी रत्नजित तामाङलाई हराउँदै उपाधि जितेका थिए । यसैगरी, उनले पुष्पलाल स्मृति वरीयता राष्ट्रिय ब्याडमिन्टनमा सिनियरतर्फ लगातार दुईपटक उपाधि जिते । साइनो कप राष्ट्रिय ब्याडमिन्टनमा समेत उनले शीर्ष स्थान हात पारेका थिए । २०२४ ओलम्पिक प्रोजेक्टका लागि नेपालबाट प्रिन्स छनोट भएका छन् ।
क्रिकेटमा गत वर्ष कुशलको नाम निकै चर्चामा रह्यो । राष्ट्रिय टोलीबाट डेब्यु गरेको वर्षमै कुशलले आफ्नो क्षमता देखाउन सफल भए । उनले ११ वटा अन्तर्राष्ट्रिय टी–२० मा एक शतक र पाँच अर्धशतकसहित चार सय ९८ रन बनाएका छन् । यसैगरी, ६ एकदिवसीय अन्तर्राष्ट्रियमा एक अर्धशतकसहित एक सय ४४ रन जोडेका कुशल आइसिसी टी–२० वरीयताको ३१औँ स्थानमा छन् । आइसिसीको वरीयतामा कुनै पनि नेपालीले प्राप्तको गरेको स्थान यो नै सर्वाधिक ठूलो हो ।
पिपल्स च्वाइसमा मनोनीत भएकी सन्तोषी नेपालको म्याराथनको मध्यमगतिकै राम्रो धाविका मानिन्छिन् । उनले १३औँ सागदेखि २०७८ को प्रधानसेनापति हाफ म्याराथनसम्म सहभागी भएका नौवटै प्रतियोगिता स्वर्ण जितेकी छिन् । नेपालगन्जमा सम्पन्न हाफ म्याराथनमा स्वर्ण जित्दा सन्तोषीले एक घन्टा १८ मिनेट ४८ सेकेन्ड लगाइन् । १३औँ सागमा १० हजार मिटरकी स्वर्णधारी सन्तोषी गोल्डेन स्प्रिन्ट मिटका उत्कृष्ट खेलाडी हुन् ।
यसैगरी, फुटबलकी एन्जिला राष्ट्रिय टोलीकी पहिलो रोजाइकी गोलरक्षक हुन् । २०७७ मा भएको राष्ट्रिय महिला लिगमा एपिएफले उपाधि उचाल्दा गोलरक्षक भूमिका निर्वाह गरेकी एन्जिलाले १२ खेलमा एक मात्र गोल व्यहोरेकी थिइन् । पाकिस्तानी राष्ट्रिय लिग च्याम्पियनसिपमा मासा युनाइटेडबाट प्रतिस्पर्धा गरेकी एन्जिलाको जीवनमा आधारित फिल्म बनिरहेको छ । मनोनयनमा टेबुल टेनिसकी एलिना नेपालको वरीयतामा दोस्रो स्थानमा छिन् ।
१८औँ संस्करणको अवार्डमा सर्वोत्कृष्ट दशक पुरुष खेलाडी, सर्वोत्कृष्ट दशक महिला खेलाडी, सर्वोत्कृष्ट दशक प्रशिक्षक, पाराएथलिट सम्मान, स्पेसल अवार्ड, लाइफटाइम एचिभमेन्ट र एसियन स्पोर्टस् जर्नालिस्ट अवार्ड रहेका छन् । यस वर्ष पनि एनएसजेएफ पल्सर स्पोर्टस् अवार्डको मुख्य प्रायोजकको रूपमा हंशराज हुलासचन्द एन्ड कम्पनी प्रालिको बजाज पल्सर मोटरसाइकल रहेको छ । दशक खेलाडी पुरुष, महिला, प्रशिक्षक र पिपल्स च्वाइस गरी चार विधाका विजेतालाई बजाज पल्सर मोटरसाइकल प्रदान गरिनेछ । विधाका विजेतालाई ५० हजार रुपैयाँ प्रदान गरिनेछ ।
