केही दिनदेखि अमेरिकन सहयोगको मिलेनियम च्यालेन्ज कर्पोरेसन (एमसिसी)लाई आधार बनाएर लगानीकर्ता जलविद्युत् कम्पनीको कारोबारमा सक्रिय भइरहेका छन् । यस्तै प्रभाव सोमबारको सेयर बजारमा पनि देखियो । एमसिसीसम्बन्धी विवादहरू कायम रहे पनि संसद्मा एमसिसीको प्रस्ताव टेबुल भएसँगै जलविद्युत् क्षेत्रका कम्पनीहरूमा पुनः लगानी बढेको छ ।
सोमबार नेप्से २५ दशमलव ४१ अंक (०.९४ प्रतिशत)ले बढेर दुई हजार सात सय १८ दशमलव ५१ बिन्दुमा पुग्दा जलविद्युत् समूहको परिसूचक पनि २ दशमलव २४ प्रतिशतले बढेको छ । नेप्सेमा सूचीकृत सबै हाइड्रोपावर कम्पनीहरूको सेयर मूल्य सोमबार बढेको छ । कारोबार रकमका आधारमा यस दिन प्रमुख पाँचभित्र अरुण भ्याली हाइड्रोपावर, अपि पावर र नेसनल हाइड्रोपावर कम्पनी पनि परेका छन् । यिनको आठ करोडदेखि १० करोड रुपैयाँसम्मको कारोबार भएको छ ।
यस दिन सबैभन्दा धेरै कारोबार हुनेमा नेपाल दूरसञ्चार कम्पनी र जीवन विकास लघुवित्त वित्तीय संस्था रहेका छन् । यी कम्पनीको २६ करोड ५० लाख रुपैयाँदेखि २६ करोड रुपैयाँको कारोबार भएको छ । सोमबारको कुल कारोबारमा १७ दशमलव ५५ प्रतिशत हिस्सा यी दुई कम्पनीको रहेको छ । हालै लाभांश घोषणा गरेको जीवन विकास लघुवित्तको सेयरमा लगानीकर्ता झुम्मिएका छन् । त्यस्तै, नेपाल टेलिकमको पनि सर्वसाधारण सेयर संरचना बढाइने हल्लाले यसमा लगानी बढेको हो । कम्पनीले भने हालसम्म यसबारे आधिकारिक जानकारी दिएको छैन ।
सोमबार एक सय ५४ वटा कम्पनीको सेयर मूल्य बढेको छ भने ३३ वटाको सेयर मूल्य घटेको छ । युनाइटेड इदी–मर्दी आरबी हाइड्रोपावर कम्पनीको १० प्रतिशतले मूल्य बढेर सर्किट लागेको छ । गुराँस लघुवित्त वित्तीय संस्था, नेपाल हाइड्रो लिमिटेड, बुद्धभूमि नेपाल हाइड्रोपावर कम्पनी, साहस ऊर्जा लिमिटेडको ६ देखि ८ प्रतिशतसम्मले मूल्य बढेको छ । घट्ने कम्पनीमा सबैभन्दा बढी नबिल बैंकको ऋणपत्र २०८५, कालिका लघुवित्त वित्तीय संस्था, ग्रामीण विकास लघुवित्त वित्तीय संस्था र कर्पोरेट डेभलपमेन्ट बैंक रहेका छन् । यी कम्पनीहरूको मूल्य करिब २ प्रतिशतले घटेको छ ।
अघिल्लो दिनको तुलनामा यस दिन कारोबार एक करोड रुपैयाँले घटेको छ । दुई सय २४ कम्पनीको करिब ५० लाख कित्ता धितोपत्र र ऋणपत्र गरी तीन अर्ब रुपैयाँको कारोबार भएको छ ।
