रसुवामा बालबालिकालाई लगाउन ल्याइएको कोरोनाविरुद्धको करिब १५ सय डोज मोडर्ना खोप फिर्ता पठाइएको छ । जिल्लामा १२ देखि १७ वर्षसम्मका बालबालिकालाई दिन लागिएको खोपमध्ये १४ सय ९० डोज खोप स्वास्थ्य सेवा विभागको व्यवस्थापन महाशाखाअन्तर्गत आपूर्ति शाखामा फिर्ता पठाइएको हो ।
गत ११ देखि १८ पुससम्म जिल्लाको पाँचवटै गाउँपालिकाको ४३ वटा माध्यमिक तहका १२ देखि १७ वर्षसम्मका बालबालिकाका लागि खोप अभियान सञ्चालन गरिएको थियो । तर, तोकिएको लक्ष्यअनुसार प्राप्त तथ्यांकका बालबालिकाले खोप लगाउन नआउँदा खोप फिर्ता गर्नुपरेको स्वास्थ्य कार्यालय रसुवाका प्रमुख वसन्त चालिसेले जानकारी दिए । ‘११ देखि १३ पुससम्म खोप अभियान थियो, हामीले पाँच दिन थप गरेर १८ गतेसम्म खोप अभियान सञ्चालन गर्यौँ, विवरणअनुसार पाँचवटै गाउँपालिकाका सबै बालबालिका खोप लगाउन आएनन्,’ उनले भने ।
गत बुधबार बाँकी रहेका सबै खोप स्वास्थ्य सेवा विभागको व्यवस्थापन महाशाखाअन्तर्गत आपूर्ति शाखामा फिर्ता पठाइएको उनले बताए । ‘मोडर्ना खोप एक महिनासम्ममा लगाइसक्नुपर्ने हुन्छ, ४८ सय डोज खोप ल्याएका थियौँ, लक्ष्यअनुसारका विद्यार्थी नआएपछि १४ सय ९० डोज फिर्ता गर्यौँ । एक भाइल खोप ११ जनासम्मलाई लगाउन सकिन्छ,’ चालिसेले भने, ‘१८ वर्षमाथिका नागरिकलाई लक्ष्यअनुसारको खोप लगाइयो, तर १२ देखि १७ वर्षसम्मका बालबालिकालाई लक्ष्यअनुसार लगाउन सकिएन ।’
