भदौभित्र १८ वर्षमाथिका सबैलाई कोभिड– १९ विरुद्धको पूर्ण खोप लगाउने लक्ष्य
रसुवाका दुईवटा गाउँपालिकामा १८ वर्षमाथिका सबै नागरिकले कोरोनाविरुद्धको पहिलो मात्राको खोप लगाएका छन् । जिल्लाको आमाछोदिङमाे र गोसाइँकुण्ड गाउँपालिकाका १८ वर्षमाथिका सबै नागरिकले कोरोनाविरुद्धको पहिलो मात्राको खोप लगाएका हुन् ।
जिल्लाको आमाछोदिङमाे र गोसाइँकुण्ड गाउँपालिकाका १८ वर्षमाथिका सबै योग्य नागरिकले कोरोनाविरुद्धको पहिलो मात्राको खोप लगाएको स्वास्थ्य कार्यालय रसुवाका प्रमुख वसन्त चालिसेले बताए ।
स्वास्थ्य कार्यालय रसुवाको तथ्यांकअनुसार गोसाइँकुण्ड गाउँपालिकामा आठ हजार ६ सय १८ जनसंख्या रहेको छ । जसमध्ये १८ वर्षमाथिका काेरोनाको खोप लगाउन योग्य व्यक्ति पाँच हजार ६ सय ८१ जना रहेका छन् ।
जसमध्ये एक हजार दुई सय ९५ जनाले कोभिसिल्डको पहिलो मात्राको खोप लगाएका छन् । त्यसैगरी पाँच हजार दुई सय ५१ जनाले भेरोसेलको पहिलो मात्राको खोप लगाएका छन् । दुई सय ३७ जनाले जोन्सन एन्ड जोन्सन खोप लगाएका छन् । स्वास्थ्य कार्यालय रसुवाको तथ्यांकअनुसार गोसाइँकुण्ड गाउँपालिकामा लक्ष्यभन्दा बढी एक हजार एक सय दुईजनालाई कोरोनाको पहिलो मात्राको खोप लगाइएको छ ।
यसैगरी जिल्लाको आमाछोदिङमाे गाउँपालिकामा पाँच हजार सात सय ३३ जनसंख्या छ । जसमध्ये १८ वर्षमाथिका काेरोनाको खोप लगाउन योग्य व्यक्ति तीन हजार पाँच सय २३ जना रहेका छन् । जसमध्ये तीन हजार चार सय ९८ जनालाई कोरोनाविरुद्धको पहिलो मात्रा लगाइएको छ । तीन सय ६२ जनाले कोभिसिल्डको पहिलो मात्राको खोप लगाएका छन् भने दुई हजार आठ सय ७३ जनाले भेरोसेलको पहिलो मात्राको खोप लगाएका छन् । यसैगरी दुई सय ६२ जनाले जोन्सन एन्ड जोन्सनकाे खोप लगाएका छन् ।
गाउँपालिकामा कोरोनाविरुद्धको पहिलो मात्राको खोप लगाउने यो ९९ दशमलव २९ प्रतिशत हो । अब २५ जनालाई कोरोनाविरुद्धको पहिलो मात्राको खोप लगाउन बाँकी रहेको स्वास्थ्य कार्यालय रसुवाका प्रमुख चालिसेले बताए । बाँकीलाई पनि छिट्टै खोप लगाइने उनको भनाइ छ ।
यस्तै, जिल्लाको कालिका गाउँपालिकामा ५५ दशमलव ८५ प्रतिशतले कोरोनाविरुद्धको पहिलो मात्राको खोप पाएका छन् । नौकुण्ड गाउँपालिकामा ४१ दशमलव ५५ प्रतिशतले कोरोनाविरुद्धको पहिलो मात्राको खोप लगाएका छन् । उत्तरगया गाउँपालिकामा ५४ दशमलन आठ प्रतिशलले कोरोनाविद्धको पहिलो मात्राको खोप लगाए ।
स्वास्थ्य कार्यालयको तथ्यांकअनुसार जिल्लामा ४४ हजार नाै सय ७७ जनसंख्या छ । जसमध्ये १८ वर्षमाथिका कोरोनाविरुद्धको खोप लगाउन योग्य २९ हजार एक सय ६ जना रहेका छन् । जसमध्ये हालसम्म ६९ दशमलव ३० प्रतिशतले कोरोनाविरुद्धको पहिलो मात्राको खोप पाएका छन् । कोरोनाविरुद्धको पहिलो मात्राको कोभिसिल्ड खोप तीन हजार दुई सय ८० जनाले पाएका छन् भने १४ हजार आठ सय ९२ जनाले भेरोसेलको पहिलो मात्राको खोप पाएका छन् ।
यसैगरी, जिल्लामा कोरोनाविरुद्धको दोस्रो मात्राको खोप २२ दशमलव ८८ प्रतिशतले लगाएका छन् । दोस्रो मात्राको कोभिसिल्ड खोप एक हजार ३० जनाले लगाएका छन् भने तीन हजार ६ सय ३२ जनाले भेरोसेलको दोस्रो मात्रा लगाएका छन् । यस्तै, एउटा मात्र खाेप लगाए हुने जोन्सन एन्ड जोन्सन दुई हजारलाई लगाइएको छ । जिल्लामा आगामी भदौभित्र १८ वर्षमाथिका सबैलाई कोभिड–१९ विरुद्धको पूर्ण खोप लगाउने लक्ष्य रहेको स्वास्थ्य कार्यालय रसुवाका प्रमुख चालिसेले बताए ।
२७ फागुन ०७७ मा कोरोनाविरुद्धको कोभिसिल्डको पहिलो डोज लगाएका ज्येष्ठ नागरिकहरुले दोस्रो डोजको खोप पाउने भएका छन् । रसुवाका ६५ वर्षमाथिका करिब दुई हजार एक सय ज्येष्ठ नागरिक कोभिसिल्डको दोस्रो खोपको पर्खाइमा छन् । आठ हप्तादेखि १२ हप्तासम्ममा खोप लगाइसक्नुपर्ने भनिएको थियो । तर, कोभिसिल्ड खोप लगाएको १८ हप्ता पूरा हुँदासमेत दोस्रो डोजको खोप पाउन सकेका थिएनन् ।
अब उनीहरूले एस्ट्राजेनेकाको खोप पाउने भएका छन् । त्यसका लागि सोमबार एस्ट्राजेनेकाको दुई हजार दुई सय ४० डोज खोप जिल्लामा आइपुगेको छ । मंगलबार सबै खोप केन्द्रमा खोप पठाइने र बुधबारदेखि खोप लगाउन सुरु गरिने स्वास्थ्य कार्यालयका प्रमुख चालिसेले बताए । उनले भने, ‘जिल्लामा एस्ट्राजेनेकाको खोप आइपुगेको छ, अब जिल्लाको पाँचवटै गाउँपालिकाका खोप केन्द्रहरूमा खोप पठाउछौँ, र त्यहीँबाट बुधबारदेखि लगाउन सुरु गर्नेछौँ ।’
