पछिल्लो एक वर्षमा एक हजार नौ सय ८२ जना प्रहरी कारबाहीमा परेका छन् । भ्रष्टाचार तथा आपराधिक गतिविधिमा संलग्नता पुष्टि भएका २७ प्रहरीलाई सेवाबाट बर्खास्त र एक सय ६६ जनालाई नोकरीबाट हटाइएको छ ।
प्रहरी प्रधान कार्यालयका अनुसार बर्खास्त हुनेमा एक डिएसपी, दुई इन्स्पेक्टर, १३ सइ, पाँच असइ, पाँच जवान र एक कार्यालय सहयोगी छन् । त्यस्तै, दुई इन्स्पेक्टर, चार सइ, तीन असइ, २३ हवल्दार, एक सय २६ प्रहरी जवान र आठ कार्यालय सहयोगीलाई सेवाबाट हटाइएको छ । सेवाबाट हटाइएकामा कतिपय राजीनामा नदिई सम्पर्कविहीन हुने प्रहरी पनि छन् । कतिपय त विदेशमा छन् ।
एक वर्षमा एक हजार एक सय पाँच प्रहरीलाई कारबाहीस्वरूप नसियत दिइएको छ । जसमा तीन डिएसपी र १७ इन्स्पेक्टर पनि छन् । दुई एसपीसहित एक सय ४४ प्रहरीको ग्रेड रोक्का भएको छ । ६४ जनाको ग्रेड घटुवा, ७२ को पदोन्नति रोक्का, आठजनाको पद घटुवा, एक सय २७ जनाको तल्लो टाइममा घटुवा भएको छ । १३ जनालाई प्रतिकूल राय दिएर कारबाही गरिएको छ ।
एक वर्षको अवधिमा दुई एसपीसहित दुई सय ५६ जना निलम्बनमा परेका थिए । निलम्बनमा पर्ने एसपीमा रामेश्वर यादव र विमल बस्नेत छन् । प्रदेश ट्राफिक कार्यालय सुर्खेतमा हुँदा अनियमिततामा संलग्न भएको पुष्टि भएपछि उनीहरूलाई निलम्बन गरी ग्रेड रोक्का गरिएको थियो । उनीहरूको निलम्बन फुकुवा भइसकेको छ ।
एक वर्षको अवधिमा ४३ जना सिनियर अफिसर कारबाहीमा परेका छन् । चार एसपी, सात डिएसपी र ३२ इन्स्पेक्टरमाथि विभिन्न प्रकारको विभागीय कारबाही भएको प्रहरी प्रधान कार्यालयले जनाएको छ । हरेक वर्ष औसतमा करिब दुई हजार प्रहरी विभागीय कारबाहीमा पर्ने गर्दछन् । उनीहरूले गरेको गल्तीअनुसार कारबाही हुने गरेको प्रहरी प्रवक्ता एसएसपी वसन्त कुँवरले बताए ।
सात सय तीन प्रहरीको राजीनामा
गत आर्थिक वर्षमा सात सय तीन प्रहरीले राजीनामा दिएका छन् । राजीनामा दिनेमा दुई डिएसपी र नौ इन्स्पेक्टर छन् । त्यस्तै, ४१ सइ, एक सय ४१ असइ, तीन सय ९६ हवल्दार, ७७ जवान र ३७ कार्यालय सहयोगी छन् । यद्यपि, अघिल्लो वर्षको तुलनामा राजीनामा दिने घटेका छन् । आर्थिक वर्ष ०७६/७७ मा दुई हजार ६४ ले, ०७५/७६ मा तीन हजार ७३ ले र ०७४/७५ मा दुई हजार पाँच सय ६७ प्रहरीले राजीनामा दिएका थिए ।
गत वर्ष कोरोना महामारीको समय भएकाले राजीनामा स्वीकृतिमा पनि कडाइ गरिएको थियो । साथै राजीनामा दिएका कतिपय प्रहरी विदेश जाने प्रचलन रहेको, तर गत वर्ष वैदेशिक रोजगार पनि अवरुद्ध भएकाले राजीनामा दिने संख्या घटेको प्रधान कार्यालयले जनाएको छ । राजीनामा दिनेमा धेरैजसो हवल्दार छन् । पेन्सन अवधि पुगेलगत्तै उनीहरूले राजीनामा दिने गरेका छन् । राजीनामा रोकी सेवामा उत्प्रेरणा बढाउन गत वर्ष प्रहरी प्रधान कार्यालयले अध्ययन गरेर उनीहरूको समस्या समाधानको पहल पनि गरेको थियो ।
घर बिदा अनिवार्य गर्ने तथा ड्युटी समय घटाउने निर्णय भए पनि त्यो प्रभावकारी हुन सकेको छैन । जवानबाट सिपाहीमा भर्ना हुन लामो समय लाग्ने भएकाले जवान र असइको बीचमा सहायक हवल्दार र वरिष्ठ हवल्दार पद थप्ने गरी प्रहरी नियमावली संशोधनको प्रक्रिया अघि बढाइएको छ ।
कारबाही : एक वर्षमा १५ सय पाँच प्रहरीलाई कारबाहीस्वरूप नसियत दिइएको छ । जसमा तीन डिएसपी र १७ इन्स्पेक्टर पनि छन् । दुई एसपीसहित १४४ प्रहरीको ग्रेड रोक्का भएको छ । ६४ जनाको ग्रेड घटुवा, ७२ को पदोन्नति रोक्का, आठजनाको पद घटुवा, १२७ जनाको तल्लो टाइममा घटुवा भएको छ । १३ जनालाई प्रतिकूल राय दिएर कारबाही गरिएको छ ।
राजीनामा : गत आर्थिक वर्षमा सात सय तीन प्रहरीले राजीनामा दिएका छन् । राजीनामा दिनेमा दुई डिएसपी र नौ इन्स्पेक्टर छन् । त्यस्तै, ४१ सइ, एक सय ४१ असइ, तीन सय ९६ हवल्दार, ७७ जवान र ३७ कार्यालय सहयोगी छन् ।
