नेपाल–चाइना ट्रेड एन्ड इन्डस्ट्रियल एसोसिएसनले दोलखा प्रहरीलाई विपद् प्रतिकार्यका लागि आवश्यक सामग्रीहरू हस्तान्तरण गरेको छ । दोलखा स्थायी घर भई राजधानी बस्दै आएका सोभित उप्रेतीको पहलमा एसोसिएसनले विपद् प्रतिकार्यका लागि अत्यावश्यक उपकरणसहितका सामग्री सहयोग गरेको हो ।
बुधबार एक कार्यक्रममार्फत उप्रेतीको समन्वयमा एसोसिएसनले लाइफ ज्याकेट, ट्रेकिङ ब्याग, रेनकोट, गमबुट, कोदालो, खानेपानी प्रशोधनसम्बन्धी उपकरण, करौती, प्राथमिक उपचारका सामग्री, त्रिपाल, डोरीलगायतका सामग्रीहरू हस्तान्तरण गरेको थियो ।
एसोसिएसनकी अध्यक्ष अञ्जु पौडेलले उप्रेतीसँगको समन्वयका आधारमा दोलखालाई प्राकृतिक विपद्को सामना गर्न प्रहरीलाई आवश्यक सामग्री सहयोग गरेको जानकारी दिइन् । उनले पहाडी जिल्ला दोलखा भौगोलिक रूपमा पनि प्राकृतिक प्रकोपको जोखिममा रहेको बताउँदै उद्धार तथा विपद् रोकथामका लागि सहयोग गरिएको बताएकी छिन् । विपद् प्रतिकार्यका लागि उपलब्ध गराइएका सामग्रीहरू जिल्ला प्रहरी कार्यालय दोलखाका प्रहरी सहायक निरीक्षकहरू मनोज भट्टराई र रोनित श्रेष्ठलाई हस्तान्तरण गरिएको एसोसिएसनले जनाएको छ । एसोसिएसनका अनुसार दोलखा प्रहरीलाई नेपाली मूल्य झन्डै २५ लाख रुपैयाँबराबरको सामग्री वितरण गरिएको छ ।
दोलखाका प्रहरी प्रमुख प्रहरी नायब उपरीक्षक भेषराज रिजालले प्राकृतिक विपद् प्रतिकार्यका लागि महत्वपूर्ण सहयोग प्राप्त भएको बताएका छन् । रिजालले जिल्लामा भइपरी आउने मुख्य विपद्सँग पनि प्रहरी सहजै ढंगले खट्न सक्ने सामग्री उपलब्ध गराएकोमा एसोसिएसन र समाजसेवी उप्रेतीप्रति आभारसमेत व्यक्त गरेका छन् । उनका अनुसार नागरिकको सुरक्षार्थ खटिने प्रहरीको आत्माबल वृद्धि गराउन एसोसिएसनले निर्वाह गरेको भूमिका महत्वपूर्ण रहेको छ ।
ग्रामीण क्षेत्रका स्वास्थ्य संस्थालाई सहयोग
त्यस्तै, एसोसिएसनले दोलखाका ग्रामीण तथा विकट क्षेत्रका स्वास्थ्यचौकीहरूलाई अक्सिजन कन्सन्ट्रेटरसहित आवश्यक स्वास्थ्य सामग्रीसमेत वितरण गरेको छ । कोभिड महामारीको दोस्रो लहरमा यसअघि कुनै पनि प्रकारका सहयोग नपाएका र अक्सिजन कन्सन्ट्रेटर नभएका स्वास्थ्यचौकीहरूलाई कन्सन्ट्रेटरसहितका सामग्री वितरण गरिएकोे उप्रेतीले बताए । उप्रेतीकै पहलमा दोलखाका झन्डै तीन दर्जन स्वास्थ्यचौकी र सामाजिक संस्थालाई झन्डै १० लाख रुपैयाँबराबरको स्वास्थ्य सामग्री हस्तान्तरण गरिएको एसोसिएसनकी अध्यक्ष पौडेलले बताइन् ।
