एनसेल आजियाटा लिमिटेडले जेठ २१ देखि लागू हुने गरी विश्वका १९ देशहरूको अन्तर्राष्ट्रिय कल शुल्क परिमार्जन गरेको छ । कम्पनीले नेपाल दूरसञ्चार प्राधिकरणले अन्य दूरसञ्चार सेवाप्रदायकलाई प्रदान गरेको स्वीकृत शुल्क तथा कलदरअनुसार नै नयाँ शुल्क तय गरेको हो ।
गत जेठ ९ गते नेपाल दूरसञ्चार प्राधिकरणले एनसेललाई नयँ शुल्कको स्वीकृति दिएको जनाइएको छ । प्राधिकरणले इटाली, माल्टा, जर्मनी, ताजिकस्तान, जोर्डन, थाइल्यान्ड, लाटभिया, स्लोभेनिया, माल्दिभ्स, बेल्जियम, इस्टोनिया, क्रोएसिाया, फिनल्यान्ड, नेदरल्यान्ड, बुल्गेरिया, सिरियन अरब रिपब्लिक, लिथुआनिया र साइप्रस गरी १९ देशहरूका लागि नयाँ अन्तर्राष्ट्रिय कल शुल्कको स्वीकृति प्रदान गरेको एनसेलले जनाएको छ ।
प्राधिकरणबाट प्राप्त यो स्वीकृतिसँगै यी देशहरूका लागि एनसेलको अन्तर्राष्ट्रिय कल शुल्क अब अरू सेवाप्रदायकले प्राधिकरणको स्वीकृतिबमोजिम लिइरहेको न्यूनतम शुल्कसँग बराबर गरेको कम्पनीको भनाइ छ ।
नयाँ परिमार्जित अन्तर्राष्ट्रिय कल शुल्कअनुसार १८ वटा देशको शुल्क करबाहेक प्रतिमिनेट ३० रुपैयाँ तथा माल्दिभ्सको प्रतिमिनेट कल शुल्क करबाहेक ३० रुपैयाँ ६५ पैसा निर्धारण भएको कम्पनीले जनाएको छ । यसअघि यी देशहरूमा कल गर्दा गन्तव्य देशअनुसार प्रतिमिनेट ४ रुपैयाँ ९९ पैसादेखि १५ रुपैयाँसम्म लाग्ने गरेको जनाइएको छ । अझै पनि माल्दिभ्सका लागि एनसेलको प्रतिमिनेट कल शुल्क अरू सेवाप्रदायकले लिने शुल्कभन्दा निकै नै कम रहेको कम्पनीले जनाएको छ ।
अन्तर्राष्ट्रिय कलका लागि कम्पनीलाई लाग्ने खर्चको तुलनामा खुद्रादर निकै नै कम भएको कम्पनीको भनाइ छ । सम्बन्धित देशका साझेदारहरूले सन् २०१६ देखि आफ्नो शुल्क बढाएका कारणले गर्दा विगत ५ वर्षदेखि एनसेलले अन्तर्राष्ट्रिय कलबापतको राजस्वमा ठूलो नोक्सानी व्यहोर्दै आएको कम्पनीको दाबी छ ।
यसअघि एनसेलले यी देशहरूका लागि प्रदान गर्दै आएको अन्तर्राष्ट्रिय शुल्क अन्य सेवाप्रदायकको स्वीकृत कल शुल्कभन्दा ६ गुणा कम दरमा ग्राहकलाई अन्तर्राष्ट्रिय कल सुविधा प्रदान गर्दै आएको कम्पनीले जनाएको छ ।
