चितवनको भरतपुरस्थित बोस्टन इन्टरनेसनल कलेजको इन्क्युबेसन विभाग, बिआइसी स्टार्ट अप्सले ‘उद्यमी विकास कार्यक्रम (६ दिने बुटक्याम्प)’ का नाममा इन्क्युबेसनको दोस्रो सत्र सुरु गरेको छ । बजेटमा उद्यमीलाई बीज पुँजी ऋण, प्रमाणपत्र धितो राखेर पाइने सहुलियतपूर्ण कर्जा, एकद्वार प्रणालीमार्फत व्यवसाय दर्तालगायतका कार्यक्रम आएको भोलिपल्ट नै भर्चुअल माध्यमबाट कार्यक्रम सुरु भएको हो ।
६ दिने बुटक्यामको पहिलो दिन कलेजका अध्यक्ष आनन्दबहादुर चन्दले बजेटले विभिन्न प्रकारका सकारात्मक व्यवस्था गरेकाले सहभागीलाई थप उत्साहित भएर उद्यम कर्ममा लाग्न प्रेरित गरेका थिए । चितवन उद्योग संघका अध्यक्ष राजु पौडेलले बजेट भाषणमा केही सकारात्मक कुरा आएको र चितवन उद्योग संघले थप समीक्षा गर्ने बताए ।
बीज पुँजीमा लगानी भएको ५ लाख रुपैयाँसम्मको रकम खर्चमा गणना गर्न मिल्ने प्रावधानको उनले स्वागत गरे । आगामी दिनमा संघले चितवनका वास्तविक उद्योगी र व्यवसायीको पहिचान गरी डाटाबेस तयार पार्ने काम अन्तिम चरणमा पुगेको र उक्त कामपश्चात् संघले नवउद्यमीलाई कस्ता उद्योगको बजारमा माग छ भनेर सुझाब दिन सक्ने उनको भनाइ थियो ।
उद्योग सुरु गर्दा कसरी दर्ता गर्ने, के–कस्ता व्यवसाय गर्नेलगायतका कुरामा अहिले पनि परामर्श गर्दै आएको उनको भनाइ थियो । उद्योग संघमा आबद्ध व्यक्ति तथा उद्योगको हकहितका लागि निरन्तर काम गरिरहेको संघले भइपरिआउने संकटमा परेका उद्योगलाई ५० लाखसम्मको राहत कोष खडा गरेको, आबद्ध संस्थाहरूलाई ३ जनाको जमानीमा १० लाखसम्म विनाधितो कर्जा प्रवाह गरिरहेको लगायतका थुप्रै कामको उनले स्मरण गरेका थिए । उद्योगी र श्रमिकबीच समन्वय सहज गर्नका लागि ‘रोजगार बैंक’ को अवधारणा प्रस्तुत गरिएको लगायत आगामी दिनमा अझ सशक्त रूपले उद्यमशीलता प्रवद्र्धन गर्ने पौडेलले प्रतिबद्धता व्यक्त गरे ।
स्किल ल्याबका संस्थापक निर्देशक नन्दकिशोर मण्डलले सहभागीलाई उद्यमशीलताको यात्रामा लागेकोमा बधाई दिँदै आफू एकदमै उत्साही भएको बताए । उद्यमशीलताको यात्रा निकै नै चुनौतीपूर्ण भएकाले नै इन्क्युबेसनको महत्व झन्–झन् बढ्दै गएको र त्यसमा स्किल ल्याब डटेर काम गर्न प्रतिबद्ध रहेको उनको भनाइ थियो ।
बिआइसी स्टार्ट अप्सका प्रमुख प्रेम गैरेले चितवनलाई नेपालकै एक उद्यमशील जिल्लाको रूपमा विकास गर्ने भिजनका साथ काम गरिरहेको बताए । सेप्टम्बरमा डेमो डे कार्यक्रम सञ्चालन गर्ने गरी इन्क्युवेसनको यस दोस्रो सत्र सुरु गरिएको उनको भनाइ थियो ।
