कोभिड– १९ प्रभावित लक्षित समूहलाई आवश्यक पर्ने अक्सिजन, भेन्टिलेटर, आइसियूलगायत अन्य स्वास्थ्य सामग्री खरिदका लागि जावलाखेल ग्रुप अफ इन्डस्ट्रिजले पछिल्लो दुई हप्तामा दुई करोड रुपैयाँको प्रत्यक्ष अनुदान प्रदान गरेको छ । ग्रुपले धुलिखेल अस्पताललाई अक्सिजन प्लान्ट र आइसियू विस्तारका लागि एक करोड ३५ लाख रुपैयाँ र देशका विभिन्न प्रदेशका सामुदायिक समूहलाई ७५ लाख रुपैयाँ सहयोग गरेको हो ।
सामुदायिक समूहलाई गरिएको सहयोगमा नेपाल भेन्टिलेटर सर्भिसलाई हाइ–फ्लो क्यानुला भेन्टिलेटर खरिद, वीरगंगा महानगरपालिकामार्फत वीरगन्ज र पर्सामा अस्थायी कोभिड अस्पताल सञ्चालनका लागि सहयोग गरेको जनाइएको छ । त्यस्तै, ललितपुर महानगरपालिका र ज्यापू समाजको सहयोगमा ललितपुरका रोटरी क्लबहरूमार्फत सञ्चालित आइसोलेसन सेन्टरका लागि उपकरण र सामग्री खरिदका लागि सहयोग गरेको ग्रुपले जनाएको छ ।
मोरङको विराटनगरमा अक्सिजनसहितको आइसोलेसन सेन्टर सञ्चालनका लागि रोटरी क्लब अफ विराटनगर युनिकलाई सहयोग गरिएको छ । झापाको रोटरी क्लब अफ बिर्तामोडलाई अक्सिजन बैंक सञ्चालन गर्न सहयोग गरेको जनाइएको छ ।
त्यस्तै, कैलालीको रोटरी क्लब अफ धनगढीलाई अक्सिजन बैंक सञ्चालन गर्न तथा रुपन्देहीको लायन्स क्लब अफ बुटवलमार्फत अक्सिजन ग्यास भर्ने कार्यका लागि सहयोग गरेको ग्रुपले जनाएको छ । रोटरी क्लब अफ भैरहवामार्फत सञ्चालित आइसोलेसन सेन्टरका लागि उपकरण खरिदमा तथा भैरहवा चेम्बर अफ कमर्समार्फत रुपन्देहीमा सञ्चालित अक्सिजन ग्यास भर्ने कार्यका लागि सहयोग गरेको जनाइएको छ । देशभरि आफ्ना ग्राहक तथा स्थानीय समुदायका लागि पाँच लाख फेस मास्क वितरण गरेको ग्रुपले जनाएको छ ।
जावलाखेल ग्रुप अफ इन्डस्ट्रिजका ग्रुप कार्यकारी निर्देशक ससिन जोशीले अहिलेको कठिन समयमा एक सच्चा कर्पोरेट नागरिकको हैसियतले व्यापारिक घरानाहरूले कुनै पनि अपेक्षा नराखी स्वच्छ रूपले सहयोगी भाव विकास गर्नुपर्ने बताए । कर्पोरेट सेक्टर पनि यही समुदायको एक अभिन्न हिस्सा भएको र जसको अस्तित्व समुदायको हितसँग निर्भर गर्ने उनको भनाइ थियो ।
