पहिलोपटक अफ्रिकाबाट बोयर जातका बाख्रा तथा बोकापालन सुरु गरेको सुनौला बाख्रा फार्म मन्थलीले किसानको मागअनुसारको बाख्रा तथा बोका पु¥याउन सकेको छैन । बोयर जातका बाख्रा तथा बोकाको माग अत्यधिक आउन थालपछि फार्मले माग पूरा गर्न नसकेको हो ।
किसानहरूले बाख्रा नब्याउँदै बाख्राको पेटमा भएको पाठापाठीको समेत बैना गर्ने गरेका छन् । बोयर जातका बाख्रा उन्नत र बढी तौलको हुने भएकाले रामेछापका पशुपालक किसानको रोजाइमा परेको हो ।
बाख्रापालक किसानहरूको आय–आर्जनमा अभिवृद्धि गर्ने तथा पशुजन्य खाद्य पौष्टिक पदार्थको पहुँच र उपलब्धतामा सुधार ल्याउने उद्देश्यले सुनौला बाख्रा फार्मले अफ्रिकाबाट बाख्रा खरिद गरी जिल्लामा बाख्रा फार्म सञ्चालन गरेको हो । बोयर जातका बोकाबाट लोकल बाख्रामा क्रस गराएर जन्मने पाठापाठीको माग अत्यधिक मात्रामा रहेको सुनौला बाख्रा फार्मका प्रोप्राइटर साधुराम ढुंगेलले जानकारी दिए ।
उनले भने, ‘बोयर जातका बाख्रा र बोकाको जिल्लामा अत्यधिक मात्रामा माग रहेको छ । जिल्लाबाहेक ओखलढुंगा, दोलखा, काभ्रे, सिन्धुली, सोलु, सिन्धुपाल्चोक र भक्तपुरलगायतका ३५ वटा जिल्लामा फार्मबाट उत्पादित बोका तथा बाख्राहरू बिक्री–वितरण गरिसकेका छौँ ।’
