नेपाल कम्युनिस्ट पार्टी (माओवादी केन्द्र)का नेता नारायणकाजी श्रेष्ठले केही दिनभित्रै स्थायी कमिटीको औपचारिक बैठक बसेर समसामयिक राजनीतिबारे निर्णय लिने बताएका छन् । बिहीबार पार्टी केन्द्रीय कार्यालय पेरिसडाँडामा नेकपा (माओवादी केन्द्र)को स्थायी कमिटीको अनौपचारिक बैठकपछि सञ्चारकर्मीहरूसँग कुरा गर्दै नेता श्रेष्ठले एक–दुई दिनभित्रमा स्थायी कमिटीको औपचारिक बैठक बसेर वर्तमान राजनीतिक घटनाक्रमको सम्बन्धमा कसरी अगाडि बढ्ने भन्ने सम्बन्धमा निर्णय लिने बताए ।
बिहीबारको अनौपचारिक बैठकमा पछिल्लो राजनीतिक परिस्थितिको विश्लेषण गर्नुका साथै विभिन्न राजनीतिक दलहरूसँग भएका वार्ताको ब्रिफिङ गर्ने काम भएको उनले बताए । बैठकमा पार्टीको सांगठनिक प्रक्रियाको विषयमा पनि प्रारम्भिक छलफल भएको बताए ।
उनले भने, ‘पछिल्लो राजनीतिक परिस्थितिको विश्लेषण, विभिन्न पार्टीहरूसँग भएको अहिलेसम्मको वार्ताको ब्रिफिङ गर्ने काम गर्यौँ । अहिले पनि परिस्थिति अझै स्पष्ट भइसकेको छैन । विभिन्न राजनीतिक पार्टीहरूसँगको वार्ताको क्रममा अहिलेको राजनीतिक परिस्थितिमा अगाडि कसरी बढ्ने भन्नेबारेमा निर्क्याेल गर्न केही समय पनि माग गरेका छन् । यो सबै परिस्थिति हेर्दा हामीले स्थायी कमिटीको औपचारिक बैठक एक–दुई दिनभित्रमा बसेर नै अहिलेको राजनीतिक घटनाक्रमहरूलाई कता लैजाने र कोर्स कसरी अगाडि बढाउने भन्नेबारेमा र हाम्रो भूमिकाबारे हामी आवश्यक निर्णय लिनेछौँ । आज हामीले हाम्रो पार्टीको सांगठनिक प्रक्रिया कसरी अगाडि बढाउने र देशव्यापी रूपमा अभियान कसरी लैजाने, राष्ट्रिय रूपमा प्रशिक्षण, भेला वा सम्मेलनचाहिँ के गर्ने भन्नेबारेमा पनि प्रारम्भिक छलफल फेरि गरेका छौँ । स्थायी कमिटीको पहिलाको सोचअनुसार नै हामीले स्थगित केन्द्रीय कमिटी बैठक र राष्ट्रिय भेला वा सम्मेलन छिट्टै गर्ने र स्थायी कमिटीको बैठकबाट औपचारिक रूपमा निर्णय गर्ने निष्कर्ष पनि निकालेका छौँ ।’
नेता श्रेष्ठले प्राविधिक रूपमा पत्र लेखेर समर्थन फिर्ता गर्न बाँकी रहे पनि वर्तमान सरकारलाई आफ्नो पार्टीको समर्थन नरहेको बताए । आफूहरूले समर्थन फिर्ता नलिएका कारण नेपाली कांग्रेस र जसपाले सरकारबारे निर्णय गर्न नसकेको कुरा सत्य नभएको पनि श्रेष्ठले बताए । उनले भने, ‘हामीले औपचारिक रूपमा हाम्रो पार्टीको यो सरकार समर्थन छैन भनेर लेखेर दिने प्राविधिक कुराका कारणले नेपाली कांग्रेस र जसपाले निर्णय नगरेको भन्नेकुरा सत्य होइन । नेपाली कांग्रेस र जसपाले आफ्नै दृष्टिकोणका आधारमा निर्णय गर्नुपर्यो यो सरकारलाई राख्ने कि अविश्वासको प्रस्ताव पेस गर्ने ? त्यसको निम्ति हामी गम्भीर अपिल गर्दछौँ ।’
नेता श्रेष्ठले माओवादी केन्द्रले वर्तमान संसद्लाई पूरा अवधि क्रियाशील गराउन चाहेका कारण सरकारलाई औपचारिक रूपमा समर्थन फिर्ता गर्नुअगाडि पार्टीले सम्पूर्ण राजनीतिक पार्टीहरूसँग छलफल गरेर राजनीतिक परिस्थितिको ठीक आकलन गर्ने काम गरिरहेको पनि बताए ।
