प्रहरी भन्छ– घटना गम्भीर प्रकृतिको देखिन्छ, बालिका कसरी त्यहाँ पुगे भन्ने अनुसन्धानपछि मात्र खुल्छ
महोत्तरीको भंगहा नगरपालिका–८ धर्मपुर पासवान टोलका सात बालिका बुधबार भारतको सीतामढीस्थित रेल्वे स्टेसनमा फेला परेका छन् । भारतीय रेल्वे पुलिसले उद्धार गरी नेपाली सुरक्षा टोलीलाई बुझाएको छ । भारतमा आवश्यक कागजी प्रक्रिया पूरा भएपछि उनीहरूलाई बुधबार राति नै नेपाल ल्याइएको छ ।
उद्धार गरिएकामा १८ वर्षीया अस्मिता पासवान, १३ वर्षीया ज्योति पासवान, १२ वर्षीया अर्चना पासवान, १४ वर्षीया रञ्जना पासवान, १५ वर्षीया रिया पासवान, १८ वर्षीया नगिना पासवान र १० वर्षीया सीमा पासवान छन् । मंगलबार दिउँसो घाँस काट्न भनी घरबाट निस्किएका उनीहरू सम्पर्कविहीन भएका थिए ।
घाँस काटेर सातैजना घरपरिवारको सम्पर्कमा नआएपछि मंगलबार राति प्रहरीलाई खबर गरिएको थियो । एउटै गाउँका सात बालिका हराएको खबर पाएपछि प्रहरी, स्थानीय तथा भंगहा नगरपालिकाका प्रमुख सञ्जीव साहसमेतको टोलीले रातभरि खोजीकार्य गरेको थियो ।
सातजना बालिका एकैचोटि भारत पुगेको घटना गम्भीर प्रकृतिको देखिएकाले अनुसन्धानपछि मात्र परिवारको जिम्मा लगाउने वा के गर्ने भन्ने भन्न मिल्ने महोत्तरीका प्रमुख जिल्ला अधिकारी तीर्थराज कोइरालाले जानकारी दिए । ‘गम्भीर प्रकृतिको घटना भएकाले सत्यतथ्य बाहिर ल्याउनैपर्ने हुन्छ । सोहीअनुरूप प्रहरीले अनुसन्धान थालेको छ,’ उनले भने ।
भंगहा नगरपालिका–८ धर्मपुर पासवान टोलका उनीहरू वडा नम्बर ९ अजगेवा चौँरी क्षेत्रमा घाँस काट्न गएका थिए । बालिकाहरू सम्पर्कविहीन भएपछि परिवारमा रुवाबासी चलेको थियो । सांसद मञ्जु यादव, शारदा थापा, भंगहा नगर प्रमुख सञ्जीव साह, एसपी दिनेश आचार्यलगायत बस्तीमै पुगेर परिवारलाई सम्झाएका थिए ।
मानव बेचबिखनको प्रयास हुन सक्ने
महोत्तरीबाट बेपत्ता भएका बालिकाहरू भारतको सीतामढी रेल्वे स्टेसनमा भेटिनुले मानव बेचबिखनको प्रयास भएको र यसमा गिरोह नै सक्रिय हुन सक्ने स्थानीयले आशंका गरेका छन् । उनीहरूले घटनाको निष्पक्ष अनुसन्धान गरी दोषीलाई कारबाही गर्नुपर्ने माग गरेका छन् ।
बालबालिकाको क्षेत्रमा क्रियाशील ओरेक नेपालले उद्धार गरिएका बालिकाहरूलाई तत्काल काउन्सिलिङ गर्ने र अनुसन्धानपछि मात्र कुनै निर्णयमा पुग्नुपर्ने जनाएको छ । ओरेक नेपाल महोत्तरीका कार्यक्रम अधिकृत लीला दियालीले बालिका भारत पुग्नु सामान्य घटना नभएको बताइन् ।
