तीन नेपाली क्रिकेटरले संयुक्त अरब इमिरेट्स (युएई) मा अर्काे महिना हुने नयाँ फम्र्याटको क्रिकेट प्रतियोगिता टी–१० लिग खेल्ने भएका छन् । प्रतियोगिताका लागि मध्यम गतिका बलरद्वय करण केसी र सोमपाल कामीसँगै युवा खेलाडी कुशल मल्ल छनोट भएका हुन् ।
कुनै पनि विदेशी फ्रेन्चाइज क्रिकेट लिगमा एकैपटक दुईभन्दा बढी खेलाडी छनोट भएको यो पहिलोपटक हो । युएईले गत वर्षबाट सुरु गरेको टी–१० लिगको यो वर्षको संस्करण आगामी जनवरी अन्तिम सातादेखि सुरु हुँदै छ ।
सोमपालको यो दोस्रो विदेशी फ्रेन्चाइज प्रतियोगिता हुनेछ । करण र कुशलका लागि पहिलो अनुभव हुनेछ । सोमपालले यसअघि क्यानडाको ग्लोबल टी–२० खेलेका थिए । बिहीबार भएको ड्राफ्टबाट करणलाई पुने डेभिल्स, सोमपाललाई मराठा अरेबियन्स र कुशललाई टिम आबुधाबीले चयन गरेको हो ।
नेपाली खेलाडीका लागि यो अन्तर्राष्ट्रिय फ्रेन्चाइज क्रिकेटको राम्रो अनुभव हुनेछ । सोमपालको टोलीमा पाकिस्तानका सोएब मलिक, मोहम्मद हाफिजलगायत खेलाडी छन् । करणको टोलीमा श्रीलंकाका थिसरा परेरा, पाकिस्तानका मोहम्मद आमिर तथा कुशलको टोलीमा वेस्ट इन्डिजका क्रिस गेल, दक्षिण अफ्रिकी क्रिस मोरिसजस्ता खेलाडी सहभागी छन् ।
प्रतियोगिता खेलेबापत सोमपालले २० हजार अमेरिकी डलर प्राप्त गर्नेछन् । करण र कुशलले १०–१० हजार अमेरिकी डलर पाउनेछन् । टी–१० लिगमा गत वर्ष दुई नेपाली खेलाडी पारस खड्का र सन्दीप लामिछानेले खेलेका थिए । पारस यो वर्ष टिम आबुधाबीको इमर्जिङ ट्यालेन्ट मेन्टरको रूपमा सहभागी हुनेछन् ।
सन्दीपले यो वर्ष टी–१० लिग खेल्ने छैनन् । यो वर्ष अरू धेरै नेपाली खेलाडीले पनि प्रतियोगिताका लागि आफ्नो नाम दर्ता गराएका थिए । यद्यपि, अरू खेलाडीका लागि अनुबन्ध सम्भव भएन । नेपाली टोलीका उपकप्तान दीपेन्द्रसिंह ऐरीसहित सिनियर खेलाडी शरद भेषवाकर, कुशल भुर्तेल, आरिफ शेखले पनि नाम दर्ता गराएका थिए ।
टी–१० लिग आगामी २८ जनावरीदेखि ६ फेब्रुअरीसम्म आयोजना हुनेछ । लिगमा अबुधाबी, पुने, मरठासहित बंगला टाइगर्स, डेकन ग्लाडिएर्टस, क्वालन्डर्स, दिल्ली बुल्स र नर्दन वारियर्स टोली सहभागी छ । प्रतियोगिताको सबै खेल आबुधाबीस्थित जायेद क्रिकेट मैदानमा हुनेछ । पहिलो, दोस्रो तथा सुपर लिगमा प्राप्त अंकको आधारमा शीर्ष चार टोली छानिनेछन् । शीर्ष चार टोली नै प्ले अफमा प्रवेश गर्नेछन् ।
