कालिमाटीको तरकारी बजारमा ३४ वर्षदेखि तरकारी बोक्ने ढुवानी गाडीमा सिन्डिकेट रहेको पाइएको छ ।
कालिमाटी तरकारी बजारमा कालोप्लेटको चारपाङ्ग्रे भ्यानले भित्रका विभिन्न स्थानमा तरकारी ढुवानी गर्दै आइरहेका छन् । तर, यातायात व्यवस्था विभागले अहिलेसम्म तरकारी ढुवानीका लागि कालोप्लेटको भ्यानका थप दर्ताका अनुमति दिएको छैन ।
जसको कारण यतिवेला कालिमाटी तरकारी बजारमा निजी सवारीसाधनका गाडीले तरकारी तथा फलफूल ढुवानी गर्दै आइरहेका छन् । निजी रातोप्लेटको गाडीले तरकारी ढुवानी गर्दा तरकारी व्यवसायीसँग मूल्य बढी लिने र व्यवसायीले पनि भाडाको मूल्य थप जोडेर तरकारीको मूल्य बढाउने गरेका छन् ।
कालिमाटी तरकारी बजारमा तरकारी ढुवानीका लागि भन्दै कालोप्लेट नम्बर भएको ट्याम्पुका लागि ०४३ सालदेखि ०४८ सालसम्ममा तीन सय ५० वटा ढुवानीका लागि दर्ता भएका थिए ।
जुन नितान्त कालिमाटीबाट उपत्यकाका विभिन्न भागमा तरकारी ढुवानीका लागि प्रयोग हुन्थे । ०४८ भन्दा अघि भने त्यहाँ थप ट्याप्पु दर्ताका लागि बन्द गरियो । त्यसको १२ वर्षपछि ०६० सालमा त्यसभन्दा अघि चलेका ट्याप्पुलाई विस्थापित गरी ०६० साल भदौ २२ गते बसेको मन्त्रिपरिषद्को बैठकले ट्याप्पुलाई हटाएर कालोप्लेटको चारपाङ्ग्रे भ्यान दर्ता गरेर सञ्चालनमा ल्याइएको थियो ।
त्यसमा पनि जतिवटा पहिला दर्ता भएका थिए त्यति नै संख्यामा मात्र तीन सय ५० वटा चारपाङ्ग्रे दर्ता भएका थिए । जुन हिसाबले नयाँ थप गाडी थपिएनन् । त्यसमा भनिएको मुख्य कारण नै सिन्डिकेट रहेको सार्वजनिक सवारीसाधनका भाडा निर्धारण अभियान्ता प्रेम थापा बताउँछन् । सिन्डिकेट खारेज भएर पनि कालिमाटीको तरकारी ढुवानीमा उही नियति वर्षौँदेखि दोहोेरिइरहेको थापाको भनाइ छ ।
‘त्यतिबेला सिन्डिकेट भएकै कारणले जति मात्रमा ट्याप्पुको संख्या त्यति नै किन थपियो ? त्यसमा तीन सय ५१ वटा पनि हुन सक्थ्याे, यो भनेको सरासर उपभोक्तालाई ठग्ने काम भएकोे छ,’ उनले भने । सरकारले ०७५ साल वैशाख ४ गते बसेको मन्त्रिपरिषद्को बैठकले यातायात समितिलाई खारेज गऱ्याे । नयाँ ऐन जारी गर्दै सवारीसाधनलाई पञ्जीकरण गराउनेसम्मको व्यवस्थालाई कार्यान्वयनमा ल्यायो । तैपनि कालिमाटीमा सिन्डिकेटको झल्को दिने कार्य भइरहेको छ ।
कालोप्लेटको भन्दा रातोप्लेटको वर्चश्व
कालिमाटी तरकारी बजारमा अहिले कालोप्लेटकोले भन्दा रातोप्लेटको गाडिले तरकारी ढुवानी धेरै गर्न थालेको वर्षौँ भएको छ । रातोप्लेटको गाडी भनेको निजी प्रयोजनका लागि चल्ने सवारीसाधन हो । जसमा रातोप्लेटको गाडीले तरकारी बोक्दा महँगो भाडा लिने गरेको पाइन्छ । कालिमाटीबाट बल्खुसम्म तरकारी ढुवानी गरेको मूल्य ३५ सय देखि चार हजारसम्म लिने गरेको ढुवानीकर्ता बताउँछन् ।
कालोप्लेटका भ्यानको भाडा घटाउने र बढाउने काम यातायात व्यवस्था विभागले गर्दछ । विभागले हालसम्म पनि कालोप्लेट चारपाङ्ग्रे दर्ता ढुवानीका लागि खुला गरेको छैन ।
हाम्रो अधिकारमा छैन : कालिमाटी तरकारी बजार समिति
कालिमाटी तरकारी बजारमा जुनसुकै सवारीसाधनले तरकारी तथा फलफूल ढुवानी गरेको भए पनि समितिले रोक्न नमिल्ने कालिमाटी तरकारी बजार विकास समितिका उपनिर्देशक विनय श्रेष्ठले जानकारी दिए ।
कालोप्लेटको सवारीसाधन भन्दा रोताप्लेटको तरकारी ढुवानी गर्ने संख्या बढी रहेको श्रेष्ठले बताए । ‘अन्य गाडीले तरकारी बोकेर हामीलाई घाटा भयो भनेर त केही समूहहरू आउने त गर्दछन्, तर समितिलाई रोक्ने अधिकार कतैबाट पनि आएको छैन,’ श्रेष्ठले नयाँ पत्रिकासँग भने । त्यस्तै यसको मुख्य जिम्मेवार यातायात व्यवस्था कार्यलय र ट्राफिक प्रहरी हुनुपर्ने उपभोक्ता अधिकार मञ्चका अध्यक्ष माधव तिमल्सिना बताउँछन् ।
‘हामीले कुरा उठाएको पनि हो, तर यसबारे खासै चासो दिने काम भएन,’ तिमल्सिनाले भने ।
अनुगमन गर्न सकिन्छ, अनुगमन गर्छौँ : विभाग
विभागलाई यस विषयमा गुनासो आएको भन्दै ट्राफिक प्रहरीको समन्वयमा अनुगमन गर्ने कारबाही अघि बढाउने यातायात व्यवस्था विभागका निर्देशक लोकनाथ भुसालले जानकारी दिए । ‘यस विषयमा हामी आइतबार थप छलफल गरेर यस विषयमा छिट्टै निर्णय गर्ने र अनुगमन गर्छौं,’ भुसालले भने ।
