राष्ट्रपति डोनाल्ड ट्रम्पले सन् २०२१ को जनवरीमा नयाँ प्रशासनले पदभार लिनेबित्तिकै शक्तिलाई सहज हस्तान्तरण सुनिश्चित गर्न राष्ट्रपति निर्वाचित जो बाइडेनको टोलीसँग सहकार्य गर्न दबाबको सामना गर्न थालेका छन् ।
अमेरिकामा सामान्य सेवा प्रशासन (जिएसए)ले औपचारिक रूपमा नयाँ राष्ट्रपति चुनेको मान्यता दिने प्रचलन छ जसले संक्रमणकाल सुरु गर्छ । तर, ट्रम्पले नियुक्त गरेकी सामान्य सेवा प्रशासनकी प्रमुख प्रशासक एमिली मर्फीले कुनै प्रक्रिया सुरु गरेकी छैनन् । मर्फीले बाइडेनको टिमसँग सहकार्य गर्नेबारेमा राष्ट्रपति ट्रम्पले कुनै निर्देशन नदिएको बताएकी छिन् ।
स्पष्टताको अभावले प्रश्नहरू खडा गरिरहेको छ । यसबाट ट्रम्पले सार्वजनिक रूपमा बाइडेनको जितलाई मान्यता नदिएको र चुनावमा धाँधली भएका झुटा दाबीलाई अझै पनि सत्य साबित गर्न खोजेझैँ देखिँदै छ ।
अमेरिकी आधुनिक युगमा राष्ट्रपतिले आफ्नो उत्तराधिकारीका लागि त्यस्तो अवरोध खडा गरेको कुनै उदाहरण छैन । विशेषगरी यस वर्ष चुनौती बढी छ किनकि बाइडेनले महामारीको बीचमा प्रशासन सम्हाल्दै छन् जहाँ सरकारमाथि बृहत्तर जवाफदेहीको खाँचो छ । ‘अमेरिकाको राष्ट्रिय सुरक्षा र आर्थिक चासो मुख्य रूपमा संघीय सरकारको कार्यक्षेत्रमा रहेको अवस्थामा अमेरिकी प्रशासनले जनताको इच्छाको सम्मान गरी सत्ताको सहज र शान्तिपूर्ण हस्तान्तरण गर्नुपर्छ,’ बाइडेनका संक्रमणकालीन सहयोगी जेन साकीले ट्विटमा भनेका छन् ।
अमेरिकाको गैरनाफामूलक संस्था सेन्टर फर प्रेसिडेन्सियल ट्रान्जिसनको सल्लाहकार बोर्डले पनि ट्रम्प प्रशासनलाई चुनावपछि संक्रमणकाल तुरुन्तै प्रारम्भ गर्न र बाइडेन टोलीलाई संक्रमकालीन ऐनबमोजिम स्रोतहरूमा पूर्ण पहुँच उपलब्ध गराउन आग्रह गरेको छ । शनिबार अमेरिकाको ४६औँ राष्ट्रपतिमा निर्वाचित बाइडेनले राष्ट्रपति ट्रम्पबाट पर्याप्त सहयोग प्राप्त नगरे पनि सरकार निर्माणको कदम भने चालेका छन् ।
बाइडेनले सर्वप्रथम कोरोना भाइरसमा ध्यान केन्द्रित गर्ने जनाएका छन् । अमेरिकामा हालसम्म लगभग दुई लाख ४० हजार नागरिकको ज्यान गइसकेको छ । बाइडेनले सोमबार एक कार्यदलको कार्य विवरण घोषणा गर्ने जनाएका छन् । जसले महामारीलाई नियन्त्रणमा ल्याउने प्रयासको खाका तयार गर्नेछ । यस कार्यदलले आगामी २० जनवरीमा बाइडेनले राष्ट्रपति पद ग्रहण गरेपछि कार्यान्वयन थाल्नेछ ।
बाइडेनले यसअघि नै शल्य चिकित्सक डा. विवेक मुर्थी र पूर्व खाद्य तथा औषधि प्रशासन आयुक्त डेभिड केसलरलाई कार्यदलको सहअध्यक्षका रूपमा घोषणा गरिसकेका छन् । बाइडेनले प्रशासन समीक्षा टोलीको गठन गर्ने र जसले हालको ट्रम्प प्रशासनका मुख्य निकायहरूसँग सम्पर्क स्थापना गर्नेछ । उनीहरूले विवरण संकलन गरी त्यसको समीक्षा गर्नेछन् । जस्तै बजेट र कर्मचारी निर्णयहरू, बाँकी नियमहरू र प्रक्रियामा रहेका अन्य कामहरू । तर, त्यो प्रक्रिया पूर्ण रूपमा सुरु हुन सक्दैन जबसम्म बाइडेनलाई जिएसएले राष्ट्रपति–निर्वाचित रूपमा मान्यता दिँदैन ।
जिएसएको नेतृत्वले स्वतन्त्र र पक्षपातरहित ढंगले कार्य गर्ने विश्वास गरिन्छ र कम्तीमा संघीय सरकारका केही अवयवहरूले संक्रमणकालीन योजनाहरू कार्यान्वयन गर्न सुरु गरिसकेका छन् । उदाहरणका लागि, नागरिक उड्डयन अधिकारीहरूले डेलावेयरको विल्मिंगटनस्थित बाइडेन लेकफ्रन्टको घरमाथिको हवाई क्षेत्र प्रतिबन्धित गरेका छन् भने सिक्रेट सर्भिसले राष्ट्रपति–निर्वाचित र उनको परिवारका लागि राष्ट्रपतिको सुरक्षा विवरणबाट एजेन्टहरू प्रयोग गर्न थालेको छ ।
डेमोक्रेटका केही नेताहरूले नयाँ प्रशासनको तयारी गरिरहेका पनि देखिएका छन् । बाइडेनका सहयोगीहरूले राष्ट्रपति–निर्वाचित र संक्रमणकालीन टोलीले रिपब्लिकन सांसदहरूसँग सम्पर्क गरेका छन् । ट्रम्पका निकटतम सहयोगीहरूमध्ये एक इजरायलका प्रधानमन्त्री बेन्जामिन नेतन्याहुले आइतबार मन्त्रिपरिषद्को बैठक बस्नुअघि पूर्वउपराष्ट्रपति तथा सिनेटर बाइडेनलाई बधाई दिएका छन् । ‘जो बाइडेनसँग मेरो करिब ४० वर्षदेखि लामो र न्यानो व्यक्तिगत सम्बन्ध रहेको छ र म उहाँलाई इजरायल राज्यको एक महान् मित्रको रूपमा चिन्दछु,’ नेतन्याहुले भने ।
रिपब्लिकन पार्टीका एक मात्र जीवित पूर्वराष्ट्रपति जर्ज डब्ल्यु बुशले बाइडेनलाई ‘एक असल व्यक्ति’ भन्दै उनको शासनकालमा अमेरिका अझ एकबद्ध हुने विश्वास व्यक्त गरेका छन् । तर दक्षिण क्यारोलिनाका सिनेटर लिन्डसे ग्राहमलगायत केही रिपब्लिकनले ट्रम्पलाई चुनावसम्बन्धी कानुनी चुनौतीहरूको अनुशरणलाई जारी राख्न आग्रह गरेका छन् ।
बाइडेनले आइतबार विलमिंग्टनस्थित घरनजिकको ब्रान्डवाईनस्थित सेन्ट जोसेफ चर्चमा भाग लिए । यहाँ उनी प्रत्येक साता जाने गर्छन् ।
उनले अरू समय प्रायः घरमै बिताएका छन् । उनका केही कर्मचारी भिडियोमार्फत घन्टाैं खर्च गरी संक्रमणकालीन योजना बनाउनेतर्फ केन्द्रित भएका छन् । ती योजनाहरू जोर्जियामा दुई सिनेटको दौडसँग पनि सम्बन्धित हुन सक्छन् किनभने यहाँ आगामी ५ जनवरीमा दोस्रो चरणको मतदान हुँदै छ । यो ठाउँमा रिपब्लिकनले ती सिटहरू जितेमा सिनेटमा रिपब्लिकनको बहुमत हुनेछ र बाइडेनको मन्त्रिमण्डल गठनमा ढिलाइ हुनुका साथै बाइडेनले अघि सारेका कैयौँ योजनालाई सहज रूपमा अघि बढाउन कठिन हुनेछ ।
शनिबार आफ्नो विजय भाषणको क्रममा बाइडेनले आफूले सबैलाई एकीकृत गरेर लैजाने बताएका थिए । उनले ट्रम्प समर्थकहरूलाई ‘एक–अर्कालाई मौका दिन’ आग्रह पनि पनि गरेका थिए ।
