जिल्ला कारागार लमजुङका कैदीबन्दीले कारागारमै टीका लगाएका छन् । विजयादशमीका दिन कारागारमा रहेका ज्येष्ठ उमेरका कैदी ६६ वर्षीय रेखबहादुर थापा क्षेत्रीको हातबाट कारागारमा रहेका कैदीबन्दीले टीका लगाएका हुन् ।
विगतका वर्षहरूमा कैदीबन्दीलाई आफन्तजनसँग टीका लगाउन दिए पनि यस वर्ष कोरोनाका कारण आफन्तलाई टीका लगाउन रोक लगाइएको कारागारका प्रमुख विष्णुप्रसाद पौडेलले बताए ।
३५ जनाको क्षमता रहेको कारागारमा हाल ८१ जना कैदीबन्दी छन् । जसमा ७५ पुरुष र ६ जना महिला कैदीबन्दी रहेका छन् । कारागारमा रहेका चौकीदार मेखबहादुर दुराले कारागारमा कैदी जीवन बिताइरहेका कैदीबन्दीलाई सकारात्मक सोचका साथ जीवनलाई थप सिर्जनशील र सीपमूलक बनाउन आग्रह गरे ।
