मोरङको रंगेली नगरपालिका कोरोन संक्रमणमुक्त भएको छ ।
नगरपालिकाका एक सय २२ जना संक्रमित सबै निको भएका छन् । नगरपालिकाका प्रमुख दिलीप बगडियाले शनिबारसम्म नगरभित्रका सबै संक्रमित निको भएको बताए ।
नगरपालिकाले विदेशबाट आएका तथा समुदायमा रहेका मानिसको स्वाब संकलन गरी परीक्षण गर्दा एक सय २२ जनामा काेराेना पोजेटिभ देखिएको थियो ।
कोरोना संक्रमणबाट रंगेली– ८ का एक युवकको भने उपचारका लागि अस्पताल लैजाँदै गर्दा बाटोमै मृत्यु भएको थियो ।
नगरपालिकाले संक्रमितसँग कन्ट्याक्ट ट्रेसिङमा आएका सबैको परीक्षण गरेर आइसोलेसनमा राखेको थियो ।
एकैचोटि धेरैजना संक्रमित फेला परेको र कोभिड अस्पतालमा पनि शय्या अभाव भएपछि रंगेली नगरपालिकाले क्वारेन्टिनलाई आइसोलेसनमा स्तराेन्नति गरेर संक्रमितको उपचार थालेको थियो ।
आइसोलेसनमा भर्ना भएका सबै एक महिनाभित्र निको भएका हुन् ।
निकाे भएर डिस्चार्ज हुने हरेकले आइसोलेसन परिसरमा एउटा रूख रोपेर घर फर्किएका छन् ।
नगर क्षेत्रमा गरिएको लकडाउन, एरिया सिल र निषेधाज्ञाको सबैले पालना गरेका कारण नगरपालिका क्षेत्र संक्रमणमुक्त हुन सफल भएको नगरप्रमुख बगडिया बताउँछन् ।
उनले भारत र अन्यत्रबाट आउने सबैलाई अनिवार्य क्वारेन्टिनमा राखेर पिसिआर परीक्षण गर्ने नीतिलाई कडाइका साथ कार्यान्वयन गरिने बताए ।
नगर क्षेत्रलाई संक्रमणमुक्त कायम राख्न सामाजिक दूरी कायम गराउने र जनस्वास्थ्यका सबै नियमलाई पालना गराउन जोड दिइने बगडियाले उल्लेख गरे ।
