मकवानपुरको ज्वालादेवीमा आगलागी हुँदा एक घर जलेर नष्ट

मकवानपुरगढी गाउँपालिका– ४, ज्वालादेवीमा आगलागी हुँदा एक घर जलेर पूर्ण रूपमा नष्ट भएको छ । आगलागीबाट करिब २५ लाख रुपैयाँबराबरको धनमाल क्षति भएको प्रहरीले जनाएको छ ।

मकवानपुर प्रहरीका अनुसार बुधबार राति करिब ११ बजे स्थानीय इन्द्रबहादुर कठायतको इँटा र काठले बनेको जस्ताको छानो भएको दुईकोठे कच्ची घर तथा सँगै रहेको भान्साघरमा एक्कासि आगलागी भएको थियो ।

आगलागी भएको खबर राति साढे ११ बजे प्राप्त भएपछि प्रहरी टोली घटनास्थलमा पुगेको थियो । आगलागीको खबर पाएपछि पुगेको हेटौँडा उपमहानगरपालिकाको वारुणयन्त्र, प्रहरी र स्थानीयवासीको संयुक्त प्रयासमा बिहीबार बिहान करिब १ः३० बजे आगो पूर्ण रूपमा निभाइएको थियो।

आगलागीबाट घर र भान्साघर पूर्ण रूपमा जलेका छन् । आगलागीले लत्ताकपडा, भाँडावर्तन, काठपात, नगद ७० हजार, चार तोला सुन, एउटा मोटरसाइकल, एउटा फोटोग्राफी क्यामेरा तथा एउटा कम्प्युटर कम्प्लिट सेट जलेर नष्ट भएको पीडितले बताएका छन् । पीडितका अनुसार आगलागीबाट करिब २५ लाख रुपैयाँबराबरको क्षति भएको छ ।

घरमा आगलागी हुँदा परिवार छिमेकीको घरमा बसेका कारण कुनै मानवीय तथा पशुचौपायाको क्षति नभएको प्रहरीले जनाएको छ । प्रारम्भिक अनुसन्धानका आधारमा करेन्ट सर्ट भई आगलागी भएको हुन सक्ने अनुमान गरिएको छ । घटनाबारे थप अनुसन्धान भइरहेको प्रहरीले जनाएको छ।