उदयपुर प्रहरीले जिल्लाका विभिन्न स्थानबाट ३८ महिनामा चार हजार ३७६.५८४ किलोग्राम गाँजा बरामद गर्दा ९९ जनालाई पक्राउ गरेको छ । जिल्ला प्रहरी कार्यालय उदयपुरले आर्थिक वर्ष ०८०/८१ देखि चालू आर्थिक वर्ष ०८३/८४ को हालसम्मको दुई महिनाबिच उक्त परिमाणको गाँजा बरामद गर्दै ६४ वटा लागुऔषधविरुद्धका मुद्दा दर्ता गरेको हो ।
जिल्ला प्रहरी कार्यालय उदयपुरका अनुसार ३८ महिना अर्थात् तीन वर्ष दुई महिनाको अवधिमा उक्त परिमाणको गाँजा बरामद गरी नष्टसमेत गरिएको छ । जिल्ला प्रहरी कार्यालय उदयपुरका सूचना अधिकारी गणेशबहादुर बमका अनुसार आर्थिक वर्ष ०८०/८१ मा २४८.०८५ केजी गाँजा बरामद गर्दा २७ जना पक्राउ परेका थिए । त्यस अवधिमा १८ वटा लागुऔषधविरुद्धका मुद्दा दर्ता गरिएको थियो ।
यसैगरी आर्थिक वर्ष ०८१/०८२ मा एक हजार ७५३ केजी गाँजा बरामद गर्दा ३९ जना पक्राउ परेका थिए । त्यसमा २७ वटा मुद्दा दर्ता गरिएको थियो । गत आर्थिक वर्ष ०८२/८३ मा एक हजार ४८.४९९ केजी गाँजा बरामद गर्दा २८ जना पक्राउ परेका थिए । त्यसमा १६ वटा लागुऔषधविरुद्धका मुद्दा दर्ता गरिएको छ ।
यसैगरी चालू आर्थिक वर्ष ०८३/८४ को साउन र भदौमा मात्र एक हजार ३२७ किलोग्रामभन्दा बढी गाँजा बरामद गरी चारजनालाई पक्राउ गरिएको छ । पछिल्लोपटक सोमबार बिहान मात्र कटारी नगरपालिका– ६ बाँकेटारस्थित शान्तिवनबाट प्रहरीले एक हजार १२२.६७ किलोग्राम गाँजासहित तीनजनालाई पक्राउ गरेको थियो ।
जिल्ला प्रहरी कार्यालय उदयपुरका प्रमुख एसपी राजन चापागाईंका अनुसार शान्तिवन क्षेत्रमा खोजतलास गर्ने क्रममा जंगलभित्र लुकाइछिपाई राखिएको अवस्थामा ५२ बोरामा प्याक गरिएको गाँजा बरामद भएको थियो । एसपी चापागाईं भन्छन्, ‘पहाडी क्षेत्रबाट तराईतर्फ गाँजा ढुवानी हुने थाहा पाएपछि पछिल्लो समय एउटा गोप्य अभियान चलाएका छौँ । त्यसकै आधारमा दुई महिनाको बिचमा ठुलो परिमाणमा गाँजा बरामद गरी अनुसन्धान गरिरहेका छौँ ।’
