उदयपुरको कटारी नगरपालिका– ६, बाँकेटारस्थित शान्तिवनबाट प्रहरीले एक हजार १२२.६७ किलोग्राम प्रतिबन्धित लागुऔषध गाँजासहित तीनजनालाई नियन्त्रणमा लिएको छ ।
जिल्ला प्रहरी कार्यालय उदयपुरका प्रमुख एसपी राजन चापागाईंका अनुसार विशेष सूचनाका आधारमा इलाका प्रहरी कार्यालय कटारीबाट खटिएको प्रहरी टोलीले सोमबार बिहान करिब ४ बजे शान्तिवन क्षेत्रमा खोजतलास गर्ने क्रममा जंगलभित्र लुकाइछिपाई राखिएको अवस्थामा ५२ बोरामा रहेको गाँजा बरामद गरेको हो ।
प्रहरीले गाँजा ओसारपसारमा प्रयोग गरिएको बा.१६च ५२६९ नम्बरको बोलेरो गाडीसमेत नियन्त्रणमा लिएको जनाएको छ । घटनामा संलग्न रहेको आरोपमा ताप्ली गाउँपालिका– १, डाँडागाउँका अन्दाजी ५५ वर्षीय रामबहादुर मगर, सोही स्थानका २१ वर्षीय नेकबहादुर मगर र ४६ वर्षीय पृथ्वीराज मगरलाई पक्राउ गरिएको जिल्ला प्रहरी कार्यालय उदयपुरले जनाएको छ ।
बरामद गाँजासहित बोलेरो गाडी नियन्त्रणमा लिएर पक्राउ परेका तीनैजनालाई इलाका प्रहरी कार्यालय कटारीमा राखी घटनाबारे थप अनुसन्धान भइरहेको चापागाईंले जानकारी दिए ।
गत भदौ ८ गते राति कटारी नगरपालिका– ४, मरुवा खोलाबाट प्रतिबन्धित १९९ केजी गाँजा टिपरसहित एकजना मानिस पक्राउ परेको थियो । बेतेनीबाट कटारीतर्फ आउँदै गरेको ना.७ख ८१७३ नम्बरको टिपरलाई चेकजाँच गर्ने क्रममा टिपरसहित गाँजा बरामद भएको थियो । एसपी चापागाईंले भने, ‘प्रहरीले गाँजासम्बन्धी विशेष अपरेसन चलाइरहेकाले उक्त गाँजा फेला परेको हो । हामी पहिलाको र अहिलेको दुवैको अनुसन्धानमा छौँ ।’
