राष्ट्रिय स्वतन्त्र पार्टीसँग प्रतिनिधिसभामा झन्डै दुईतिहाइ बहुमत सांसद छन् । तर, सभामा एकचौथाइ जुटाउन पनि नसकेपछि कोरम नपुगेर बैठक नै स्थगित गर्नुपरेको छ ।
मंगलबारको बैठकमा उद्योगमन्त्री गौरीकुमारी यादवले खानी तथा खनिज पदार्थ विधेयकमाथि विचार गरियोस् भन्ने प्रस्ताव प्रस्तुत गरेकी थिइन् । प्रस्तावमा राति सवा ८ बजेसम्म छलफल भएको थियो । छलफल सकिएर निर्णयार्थ प्रस्तुत गर्ने वेला गणपूरक संख्या नपुगेपछि बैठक स्थगित भयो । सांसदहरू हाजिर गरेर ‘टाप’ कस्दा यस्तो अवस्था निम्तिएको हो ।
बैठक स्थगित हुँदा विचार गरियोस् भन्ने प्रस्ताव स्वीकृत हुन सकेन । प्रस्ताव स्वीकृत भएको भए विधेयकमा सांसदहरूले संशोधन दर्ता गराउन ७२ घण्टाको समय पाउने थिए । अब यो प्रस्ताव १ भदौमा बस्ने बैठकमा मात्रै अगाडि बढ्नेछ ।
२१ फागुनको निर्वाचनबाट रास्वपाले दुईतिहाइ प्राप्त गरेपछि प्रतिनिधिसभामा गणपूरक संख्या नपुगेको मंगलबार पहिलोपटक हो । संविधानको धारा ९४ अनुसार प्रतिनिधिसभामा गणपूरक संख्या पुग्न ६९ सदस्य उपस्थित हुनुपर्छ । मंगलबार ६१ सांसद मात्रै उपस्थित थिए । संसद् सचिवालयका अनुसार मंगलबारको बैठकमा सुरुवातमा २२० भन्दा बढी सांसद उपस्थित थिए ।
बैठकमा उद्योगमन्त्री यादवले खानी तथा खनिज पदार्थ विधेयकमाथि छलफलका क्रममा उठेका प्रश्नको जवाफ दिएपछि सभामुख डोलप्रसाद अर्यालले निर्णयार्थ प्रस्तुत गरेका थिए । यत्तिकैमा कांग्रेस सचेतक निस्कल राईले गणपूरक संख्या नपुगेको भन्दै गणना गरिपाऊँ भनेर माग गरे । सभामुखले तीन मिनेट घन्टी बजाएर गणना गर्न लगाएका थिए । तर, गणनामा ६१ जना मात्रै उपस्थित देखिएपछि आठ सदस्य नपुगेको भन्दै बैठक स्थगित गरे ।
रास्वपा मुख्य सचेतक कवीन्द्र बुर्लाकोटीले बैठक लामो चलेकाले सांसदहरू निस्किँदा गणपूरक संख्या पुर्याउन नसकिएको बताए । उनले आगामी दिनमा यस विषयमा ख्याल गरिने प्रतिबद्धता जनाए ।
