काभ्रेपलाञ्चोक जिल्लाको भुम्लु गाउँपालिका–८ स्थित दुलालेश्वर महादेव मन्दिर नजिकबाट सुनकोशी नदीमा हामफालेर एक दम्पती बेपत्ता भएका छन ।
जिल्ला प्रहरी कार्यालय काभ्रेपलान्चोकका अनुसार बुधबार साँझ करिब ६ः३० बजे मण्डनदेउपुर नगरपालिका–७ का ६८ वर्षीय केदारनाथ पराजुली र उनकी ६७ वर्षीया श्रीमती तिलकुमारी पराजुली सुनकोशी नदीमा हामफालेर बेपत्ता भएका हुन । तिलकुमारी पराजुली बोन म्यारो क्यान्सरबाट पीडित भई अपाङ्गता भएको प्रहरीले जनाएको छ ।
स्थानीयबाट घटनाको जानकारी प्राप्त हुनासाथ प्रहरी चौकी दोलालघाटबाट प्रहरी वरिष्ठ नायब निरीक्षक यशुहरि अधिकारीको नेतृत्वमा र प्रहरी चौकी पाँचखालबाट प्रहरी निरीक्षक मनराज बानियाँको नेतृत्वमा प्रहरी टोली घटनास्थलमा खटि दम्पतिको खोजतलास गरिरहेको जिल्ला प्रहरी कार्यालय काभ्रेपलान्चोकले जनाएको छ ।
घटनाबारे थप अनुसन्धान भइरहेको पनि प्रहरीले जनाएको छ ।
