सम्पत्ति शुद्धीकरणको कसुरमा पुर्पक्षका लागि थुनामा पठाइएका बिचौलिया दीपक भट्टलगायत व्यवसायीसँग एमाले उपाध्यक्ष विष्णु पौडेलले करोडौँको संदिग्ध कारोबार गरेको अनुसन्धानमा भेटिएको छ । सम्पत्ति शुद्धीकरण विभागले अनुसन्धानमा पौडेलको गैरकानुनी सम्पत्ति र कारोबारको पर्याप्त प्रमाण संकलन भएपछि मात्रै पक्राउ गरेको खुलेको हो ।
सोमबार सुर्खेतबाट पक्राउ गरी सडकमार्ग हुँदै मंगलबार काठमाडौं ल्याएर विशेष अदालतमा उपस्थित गराइएका पौडेललाई सात दिन थुनामा राखेर अनुसन्धान गर्न अनुमति दिएको छ । उनलाई ललितपुरको प्रहरी प्रभाग पुल्चोकस्थित हिरासतमा राखिएको छ ।
अर्थमन्त्री भएका वेला पौडेलले बिचौलिया भट्टलगायतलाई सहयोग गरी आर्थिक लाभ लिएको प्रमाणहरू संकलन गरेको विभागले जनाएको छ । यसरी आर्जन गरेको सम्पत्ति विभिन्न कम्पनीमा अन्य व्यक्तिको नाममा राखेकोसमेत अनुसन्धानमा पत्ता लागिसकेको छ । श्रीराम टोबाको कम्पनीमा पौडेलको पैसामा भट्टले ३० करोड रुपैयाँबराबरको सेयर निःशुल्क लिएको खुलेको छ । सो सेयर तीन करोड ७५ लाख रुपैयाँमा खरिद गरेको देखिए पनि त्योभन्दा धेरै गुणा लाभांश लिइसकेको देखिन्छ । सो सेयर बिचौलिया भट्टको नाममा छ । विभागले श्रीराम टोबाको कम्पनीका सञ्चालकसँग बयान गरेर यसको पुष्टि गरिसकेको छ । नीतिगत रूपमा कम्पनीलाई फाइदा हुने निर्णय गरेर उनले सो सेयर हात पारेका हुन् । जसमा भट्टले मध्यस्थताको भूमिका खेलेका थिए । पौडेलले हिमालयन रिइन्स्योरेन्स र सातवटा लघुबिमालाई लाइसेन्स दिन सघाएको तथा सुपारी आयातमा सहजीकरण गरेबापत करोडौँको लाभ लिएको पनि अनुसन्धानमा खुलेको छ । बिचौलियाको प्रभावमा उनले ३० करोडभन्दा धेरै लाभ लिएको विभागको निष्कर्ष छ ।
त्यस्तै, बुटवलमा एक गाई फार्मको नाममा ३५ बिघा जग्गा भेटिएको छ । जुन जग्गा एक सामान्य व्यक्तिको नाममा लुकाएकोसमेत अनुसन्धानबाट पुष्टि भएको छ । सो फार्ममा मंगलबार विभागको टोली पुगेर विवरण संकलन गरेको छ ।
जनकपुर चुरोट कम्पनी निजीकरण गरेर नयाँ कम्पनीलाई दिने प्रक्रिया अघि बढाएबापत पनि उनले लाभ लिएको विभागको निष्कर्ष छ । अन्य काम गरे पनि जनकपुर चुरोट कम्पनीको लाइसेन्स अन्य कम्पनीलाई दिने प्रक्रियाको विषयमा भने मन्त्रिपरिषद्बाट निर्णय गराएर पनि कार्यान्वयन भइसकेको थिएन ।
पौडेलको गैरकानुनी सम्पत्ति र कारोबारको विषयमा पर्याप्त प्रमाण संकलन भएपछि मात्र पक्राउ गरिएको विभागले जनाएको छ । पक्राउअघि विभागले भैँसेपाटीस्थित उनको घरमा समेत खानतलासी लिएर ल्यापटप, पेनड्राइभलगायत केही सामान बरामद गरेको छ ।
पौडेल आठपटकसम्म मन्त्री भएका थिए । गत वर्ष अर्थमन्त्री हुँदा उनले बिचौलिया भट्टको स्वार्थअनुसार मन्त्रालय चलाएको आरोप लागेको थियो । बिचौलिया भट्ट भने गत साता नै कारागार चलान भइसकेका छन् ।
सात दिन थुनामा राखेर अनुसन्धान गर्न अनुमति
सम्पत्ति शुद्धीकरणको कसुरमा पौडेललाई सात दिन थुनामा राखेर अनुसन्धान गर्न विशेष अदालतले अनुमति दिएको छ । सम्पत्ति शुद्धीकरण अनुसन्धान विभागले सोमबार जरुरी पक्राउ पुर्जी दिएर सुर्खेतबाट पक्राउ गरेको थियो । उनलाई सडकमार्ग हुँदै मंगलबार काठमाडौं ल्याएर अदालतमा उपस्थित गराइएको थियो ।
अदालतमा पौडेलको पक्षमा कानुन व्यवसायीले हाजिरी जमानीमा छाड्नुपर्ने भन्दै बहस गरेका थिए । न्यायाधीशहरू नारायणप्रसाद पौडेल, हेमन्त रावल र उमेश कोइरालाको इजलासले पक्राउ पुर्जीको स्वीकृत दिई पहिलोपटकका लागि सात दिन म्याद थप गरेको विशेष अदालतकी सूचना अधिकारी पार्वती हितानले जानकारी दिइन् ।
