पेट्रोलपम्प व्यवसायीको छाता संस्था पेट्रोलियम डिलर्स राष्ट्रिय एसोसिएसनको शुक्रबारबाट जारी ४६ औँ वार्षिक साधारणसभा तथा १७औँ राष्ट्रिय सम्मेलनमार्फत आगामी कार्यालयका लागि नेतृत्वमा आउन मुख्य तीन पद अध्यक्ष, वरिष्ठ उपाध्यक्ष र प्रथम उपाध्यक्षमा मात्रै चुनाव हुने देखिएको छ ।
अन्य पदाधिकारीमा एकल उम्मेदवारी परेका कारण निर्विरोध निर्वाचित हुने निश्चित भएको छ भने १२ जना केन्द्रीय सदस्य पदका लागि १४ व्यवसायीले उम्मेदवारी दिएका छन् । तर, शनिबार बिहान ८ बजेसम्म उम्मेदवारी फिर्ता लिने समयसम्म केन्द्रीय सदस्य पदमा पनि निर्विरोध गर्ने गृहकार्य भइरहेको छ ।
निर्वाचनमण्डलका अनुसार अध्यक्ष पदमा वर्तमान कार्यसमितिका महासचिव विश्व अर्याल र हेटौँडाका पम्प व्यवसायी उत्सव इटेनीले उम्मेदवारी दर्ता गरेका छन् । त्यसैगरी, एकजना वरिष्ठ उपाध्यक्षका लागि चतुर्भुज सरिया अग्रवाल र जनक तिमिल्सिनाले उम्मदेवारी दर्ता गराएका छन् ।
एकजना निर्वाचित हुने प्रथम उपाध्यक्षका लागि तीनजनाको उम्मेदवारी परेको निर्वाचन समितिले जनाएको छ । प्रथम उपाध्यक्षमा अनिलकुमार सिंह, श्यामबाबु रौनियार र लयप्रसाद भण्डारीले उम्मेदवारी दर्ता गराएका हुन् ।
यसका अलवा अन्य पदाधिकारीमा एकल उम्मेदवारी परेको छ । निर्वाचन समितिका अनुसार द्वितीय उपाध्यक्षमा सुनीलकुमार बिडला, महासचिवमा अच्युतबहादुर खड्का, सचिवमा प्रेम न्यौपाने, सहसचिवमा राजन गोंगजु र कोषाध्यक्षमा श्यामकुमार बुढाथोकीले एकल उम्मेदवारी दिएका छन् ।
मनोनयन दर्ताको समयमा उनीहरूको मात्र एकल उम्मेदवारी परेकाले निर्वाचन समितिले निर्विरोध निर्वाचित भएको घोषणा गर्न मात्र बाँकी छ । एकल उम्मेदवारी दिएका सबै अर्याल समूहका हुन् ।
१२ जना रहने केन्द्रीय सदस्य पदमा भने १४ जनाले उम्मेदवारी दिएपछि दुईजनाको उम्मेदवारी फिर्ता गराएर सर्वसम्मति गर्न व्यवसायी जुटेका छन् ।
