ओपनर कुशल भुर्तेलले कीर्तिमानी शतक बनाएको खेलमा मलेसियालाई १६७ रनले हराउँदै नेपाल एसियाली खेलकुद छनोटको समूह ‘ए’को विजेता बनेको छ । नेपालको जितमा कुशलले ५४ बलमा १२६ रन बनाएका हुन् । उनी लगातार शतक बनाउने पहिलो खेलाडीसमेत यही खेलबाट बने ।
बिहीबार सिंगापुरमा टस हारेर ब्याटिङ गरेको नेपालले निर्धारित २० ओभरमा सात विकेट गुमाउँदै २७६ रनको लक्ष्य दिएको थियो । प्रत्युत्तरमा मलेसियाले २० ओभरमा नाै विकेट गुमाउँदै १०८ रन बनायो ।
अब, नेपालले समूह ‘बी’को उपविजेतासँग फाइनल प्रवेशका लागि आइतबार खेल्नेछ । समूह ‘बी’मा ओमान र हङकङ सेमिफाइनल पुगे पनि समूह विजेताकाे टुंगो लाग्न बाँकी छ ।
लिग चरणमा उत्कृष्ट प्रदर्शन गरेका नेपाल र मलेसियासँगै ओमान र हङकङले पनि एसियाली खेलकुदमा स्थान बनाइसकेका छन् । मलेसियाको इनिङ्समा कप्तान साइद अजिजले सर्वाधिक ५४ रन बनाए । ४५ बलमा ६ चौका र दुई छक्का हिर्काएका अजिजलाई दीपेन्द्रसिंह ऐरीले बोल्ड गरेका थिए । त्यस्तै, शार्विन मुयान्डीले १८ तथा ओपनर मोहम्मद हजिव ऐमनले १३ रन जोडे ।
नेपालका शेर मल्लले सर्वाधिक तीन विकेट लिए । उनले चार ओभरमा १४ रन खर्चिएका थिए । त्यसबाहेक करण केसी, सोमपाल कामी, सन्दीप लामिछाने, दीपेन्द्रसिंह ऐरी र कुशल मल्लले समान एक विकेट लिए ।
यसअघि नेपालको इनिङ्समा ओपनर कुशलले ५४ बलमा १२६ रन बनाए । साइद अजिजको बलमा पवनदीप सिंहबाट क्याच हुनुअघि उनले १४ चौका र आठ छक्का हिर्काएका थिए । यसअघि उनले ४४ बलमा शतक बनाएका थिए । कुशल लगातार शतक बनाउने पहिलो नेपाली खेलाडी बनेका छन् । यसअघि चीनसँग पनि उनले १२९ रन बनाएका थिए ।
पछिल्लो एक महिनामा उनले तेस्रो शतक बनाएका छन् । यसअघि एकदिवसीय खेलमा कीर्तिपुरमै अमेरिकाविरुद्ध अविजित १२० रन बनाएका थिए । उनी नेपालका लागि लगातार तीन शतक बनाउने पहिलो खेलाडी भएका छन् । यस्तै, उनले टी–२० आईमा दुई सय चौका र एक सय छक्का पनि पूरा गरेका छन् ।
त्यस्तै, ओनपर आसिफ शेखले २४ बलमा ६८ रन बनाए । वीरन्दीप सिंहको बलमा साइद अजिजबाट क्याच हुनुअघि उनले पाँच चौका र सात छक्का हानेका थिए । कप्तान दीपेन्द्रसिंह ऐरीले ११ बलमा ३१ रन जोडे । सन्दीप जोराले १४ बलमा १५ तथा लोकेश बमले ६ बलमा १० रनको योगदान गरेका हुन् । पूर्वकप्तान रोहितकुमार पौडेल भने डक भए । कुशल मल्ल नाै रनमा अविजित रहे ।
पहिलो विकेटका लागि आसिफ र कुशलबिच ५२ बलमा १३४ रनको साझेदारी भएको थियो । तेस्रो विकेटका लागि भुर्तेल र दीपेन्द्रबिच पनि २२ बलमा ५१ रनको दोस्रो ठुलो साझेदारी भएको हो । मलेसियाका वीरन्दीपले सर्वाधिक तीन तथा साइद अजिज र विजय उनीले समान दुई विकेट लिएका थिए ।
