संयुक्त अरब इमिरेट्सको वायुसेवा कम्पनी फ्लाई दुबईले पोखरा अन्तर्राष्ट्रिय विमानस्थलमा व्यावसायिक अन्तर्राष्ट्रिय उडान सञ्चालनका लागि इच्छुक भएको जनाएको छ । उडान सुरु गर्नका लागि फ्लाई दुबईका जोखिम व्यवस्थापन हेर्ने उपाध्यक्ष एड्रियन लुकास नेतृत्वको टोली पोखरा आइपुगेको छ । पोखरा आएको प्राविधिक टोलीले विमानस्थलको विस्तृत स्थलगत निरीक्षणसँगै विमानस्थलका महाप्रबन्धक जगन्नाथ निरौलासहितका अन्य अधिकारीहरूसँग छलफल गरेको छ ।
लुकास नेतृत्वको टोलीले विमानस्थलको धावनमार्ग, विमानस्थलको सुरक्षा प्रणाली, प्राविधिक पूर्वाधार, उडान सञ्चालनका विविधलगायतका पक्षहरूका बारेमा करिब ६ घण्टा स्थलगत जानकारी लिएको थियो । सो टोलीले पोखरा महानगरपालिकाका मेयर धनराज आचार्यसँग समेत भेट गरेको छ । स्थलगत निरीक्षण पछि लुकासले विमानस्थलमा नियमित उडानका लागि प्राविधिक र सुरक्षाका हिसाबले सक्षम रहेको प्रतिक्रिया दिए । पूर्वाधार र विदेश उडानका लागि गरिएको तयारी राम्रो रहेको भन्दै फ्लाई दुबई पोखरा–दुबई दैनिक सिधा उडान गर्न इच्छुक रहेको उनले बताए ।
फ्लाई दुबई विश्वकै प्रतिष्ठित वायुसेवा कम्पनी इमिरेट्सको भगिनी एयरलाइन्स हो । फ्लाई दुबईले पोखराबाट उडान सुरु गर्नासाथ पोखराको कनेक्टिभिटी सिधै विश्व सञ्जालसँग जोडिने र यसले पोखरा विश्वका तीन सयभन्दा बढी प्रमुख सहरहरूसँग सिधा जोडिने उनले बताए । उडान सुरु भएमा युरोप, अमेरिका र अफ्रिकाका पर्यटकहरू दुबई हुँदै सिधै सहज रूपमा पोखरा आउन सक्ने उनले बताए । संस्कृति, पर्यटन तथा नागरिक उड्डयनमन्त्री, फ्लाई दुबईका उच्च अधिकारीहरू, कम्पनीका नेपाली प्रतिनिधिहरूसँगै पोखराका मेयरसहितको छलफल एवं बैठकहरू भइसकेकाले उडानका लागि आफूहरू उत्साहित रहेको उनले जानकारी दिए ।
