विगत पाँच वर्षमा शर्माले सात हजारभन्दा बढी मुद्दा तथा निवेदनमाथि फैसला गरेको रेकर्ड
वरिष्ठताका आधारमा नभई योग्यताका आधारमा डा. मनोजकुमार शर्मालाई प्रधानन्यायाधीशमा सिफारिस गरिएको संवैधानिक परिषद्को सचिवालयले जनाएको छ । विगत पाँच वर्षमा शर्माले सात हजारभन्दा बढी मुद्दा तथा निवेदनमाथि फैसला गरेको रेकर्ड छ ।
न्यायपरिषद्ले प्रस्ताव गरेका ६ न्यायाधीशमा फैसला रेकर्ड शर्माकै नाममा धेरै देखिएको हो । ०७६ साउनदेखि ०८१ असारसम्मको अभिलेखअनुसार प्रधानन्यायाधीशमा सिफारिस शर्माले सात हजार ३८८ मुद्दा फर्स्योट गरेका थिए ।
सोही अवधिमा पहिलो वरीयतामा रहेकी सपना प्रधान मल्लले चार हजार ६७१, दोस्रो वरीयताका कुमार रेग्मीले ६ हजार २२६ र तेस्रो वरिष्ठताक्रमका हरिप्रसाद फुयाँलले ६ हजार ५२६ मुद्दाको फैसला गरेका थिए । त्यस्तै, शर्मापछि पाँचौँ रोलक्रममा रहेका नहकुल सुवेदीले दुई हजार ३९७ र छैटौँ नम्बरका तिलप्रसाद श्रेष्ठले दुई हजार ७४६ फैसला गरेको सर्वोच्च अदालतको अभिलेख छ ।
