युरोपियन च्याम्पियन्स लिग फुटबलअन्तर्गत मंगलबार राति सेमिफाइनलको पहिलो लेगमा पेरिस सेन्ट जर्मेन (पिएसजी)ले जर्मन क्लब बायर्न म्युनिखलाई ५–४ ले पराजित गरेको छ ।
घरेलु मैदानमा भएको अत्यन्त रोमाञ्चक खेलमा पिएसजीले मध्यान्तरअघि ३–२ को अग्रता लिएको थियो । पिएसजी र बायर्न आक्रामक रूपमा प्रस्तुत हुँदा पहिलो लेगको सेमिफाइनलमा नौ गोल सम्भव भयो ।
सन् १९५९–६० को युरोपियन कपमा फ्रान्कफर्टले रेन्जर्सलाई ६–३ ले हराएयताकै बायर्न र पिएसजीबिच सबैभन्दा धेरै गोल भएको सेमिफाइनल बनेको छ । यस सिजन पिएसजी ४३ र बायर्नले ४२ गोल गरिसकेका छन् ।
च्याम्पियन्स लिगको एउटै सिजनमा दुई टोलीले ४० भन्दा बढी गोल गरेको यो पहिलो अवसर हो । बायर्नका लागि ह्यारी केनले १७औँ मिनेटमा पेनाल्टीमा गोल गर्दै १–० को अग्रता दिलाए । घरेलु मैदान र समर्थकको फाइदा लिँदै पिएसजीले लगातार दुई गोल गरी २–१ को अग्रता लियो ।
भिचा भरात्स्खेलियाले २४औँ मिनेटमा १–१ का लागि गोल गरे । जोआओ नेभेसले ३३औँ मिनेटमा पिएसजीलाई २–१ को अग्रता दिलाए । खेलको ४१औँ मिनेटमा माइकल ओलिसेले बायर्नलाई २–२ को बराबरीमा पुर्याए ।
पहिलो हाफको इन्जुरी समयमा उस्मान डेम्बेलेले पेनाल्टीमा गोल गर्दै पिएसजीलाई ३–२ को अग्रता दिलाए । मध्यान्तरपछि पिएसजी थप बलियो देखियो । खेलको ५६औँ मिनेटमा भरात्स्खेलिया र डेम्बेलेले ५८औँ मिनेटमा अर्को गोल गर्दा पिएसजी ५–२ को बलियो अवस्थामा पुग्यो । बार्नले खेलको ६५औँ मिनेटमा डायोट उपामेकानोको गोलमा ५–३ का लागि गोल गरेको थियो ।
