वर्षा नहुनाले वायुमण्डलमा धुलो तैरिरहेका वेला डढेलोको धुवाँ पनि मिसिएपछि प्रदूषित भएकाे छ काठमाडौं । बुधबार साँझ एयर क्वालिटी इन्डेक्स (वायुको गुणस्तर) २५५ पुगेर काठमाडौं विश्वकै प्रदूषित सहर बनेको छ । विश्व स्वास्थ्य संगठनको मापदण्डअनुसार एक्युआई २५० भन्दा माथि पुग्नु मानव स्वास्थ्यका लागि निकै अस्वस्थकर मानिन्छ ।
वातावरण विभागको वायु प्रदूषणको अवस्थाको अभिलेख राख्ने अनलाइन पोर्टल ‘पोलुसन–जिओभि–डट–एनपी’ हेर्दा पनि काठमाडौं उपत्यका, खोँच र तराईमा प्रदूषण उच्च देखिन्छ । मौसम सुक्खा हुँदा प्रदूषणको मात्रा बढिरहेका बेला डढेलोको धुवाँ पनि मिसिएकाले काठमाडौंको आकाश तुवाँलोले ढाकेको वातावरण विभागका वातावरण निरीक्षक गोविन्द लामिछानेले बताए । फागुनमा पनि प्रदूषण बढेको थियो । तर, यो बिचमा पानी पर्दा घटेको थियो ।
देशभर तापक्रम बढेको र वर्षा हुन नसकेकाले आगलागीका घटना बढिरहेका वेला प्रदूषण पनि बढेको जल तथा मौसम विज्ञान विभागका मौसमविद् रोजन लामिछानेले बताए । नासाको मोडिज भूउपग्रहको तथ्यांकले पश्चिम तराईका वनजंगलमा अत्यधिक डढेलो देखाउँछ । २८ जिल्लाका ३०९ ठाउँमा डढेलो देखिन्छ ।
जसमध्ये सबैभन्दा बढी दाङमा ४६, सल्यानमा २९ तथा बर्दिया, बाँके र चितवनमा २३–२३ ठाउँमा छ । ‘पश्चिम क्षेत्रमा डढेलो बढेको छ, यसको धुवाँ पनि काठमाडौं आएको देखिन्छ,’ मौसमविद् लामिछानेले भने, ‘काठमाडौंको प्रदूषण घट्न वर्षा वा ठुलो हावा चल्नुपर्छ । अहिले एक्टिभ सिस्टम छैन, त्यही भएर तुवाँलो देखिन्छ ।’ उनका अनुसार आगामी शुक्रबार पहाडी क्षेत्रमा हल्का वर्षाको सम्भावना छ ।
