बर्दियामा चितुवाको आक्रमणबाट दुईजना घाइते भएका छन्। चितुवाको आक्रमणबाट राजापुर नगरपालिका– ९, ईश्वरीगन्जका ५५ वर्षीय शिवराज सिजवाल र सोही ठाउँका ३२ वर्षीय जेबीराम बस्नेत घाइते भएका हुन्।
ईश्वरीगन्जका दुर्गाप्रसाद थारूको मकैबारीमा देखिएको चितुवा स्थानीय जम्मा भएर लखेट्न जाँदा चितुवाको आक्रमणबाट सिजवाल र बस्नेत घाइते भएका हुन्। घाइते सिजवालको निधारमा र बस्नेतको घाँटी पछाडि चोट लागेको जिल्ला प्रहरी कार्यालय बर्दियाका प्रहरी निरीक्षक प्रकाशसिंह कार्कीले बताए।
घाइतेहरूको सामान्य उपचार गरेर थप उपचारको लागि भेरी अस्पताल नेपालगन्ज पठाइएको बर्दिया अस्पताल गुलरियाले जनाएको छ।
